SHILLONG: Assam aro Meghalaya a·dok damgnini simarango ong·enggipa golmalrangko namatna gita a·dok damgnini sorkarirang, skanggipa bako ta·raken kamrangko ka·e matchotatahaoba da·o bangki dongenggipa damdok biaprangko namatna gita a·dok damgnini gisepo gnigipa agangrikanide bon·chipskakuengon, ia gnigipa agangrikaniko a·dok damgnini sorkarirang, Assam-o ong·atenggipa Panchayat election matchotani ja·man a·bachengpiltaina sienga ine u·iataha.
Iani bidingo talataniko on·angengon, Assam aro Meghalaya a·dokni simarango meligrikna man·jaenggipa damdok biaprangko namatna gita a·dok sorkarirangni agangrikani, Assam-o Panchayat election-ko ong·atengani a·sel da·o dipet bon·chipkuenga ine Sukrobar salo, a·dokni Chief Secretary DP Wahlang parakataha.
“Assam-o ong·atenggipa panchayat election matchotahaon chinga agangrikaniko a·bachengpiltaignok,” ine Chief Secretary aganaha.
Assam-o ong·atenggipa Panchayat election-ko May 11 tariko election-ni result-ko parake matchotatna siengachim.
Ia gnigipa agangrikaniko a·dok damgnini sorkarirang, batanggimin bilsirangon a·bachengatahaoba da·o bilsisa batpile agangrikanirang bon·chipengkua aro dolgnini gisepo agangrikaniko a·bachengpiltaina baditaba chang tarikrangko tik ka·ahaoba ia tom·anirangko ong·atchipna man·kujaengachim.
Assam aro Meghalaya a·dok damgnini simarango ru·utbea bilsirangonin dam 12 biaprango meligrikgijanirangko nikna man·engachim indiba ia dam 12 biaprangoni damdok biaprangkode a·dok damgnini gisepo songgigrike, biaprangko sualgrikahachim. Da·o bangki dongkuenggipa damdok biaprangoba a·dok damgnini gisepo meligrikaniko ra·bana gita a·dok damgnini sorkarirang agangrikaniko a·bachengatahachim indiba ia agangrikanirang da·onan matchotchipskakujaengachim.
Ia a·dok damgnini simarango meligrikna man·jaenggipa biaprangko namatna ja·ku de·enggipa gnigipa bako man·chapenggipa biaprangara Langpih baksana Ri Bhoi a·jani Borduar, Nongwah-Mawtamur, Deshdoomreah, Block-II aro West Jaintia Hills-ni Block- I, Psiar – Khanduli jolrang ong·engachim.
A·dok damgnini gisepo meligrikna man·jaenggipa dam 12 biaprangoni skanggipa bako namatna soi ka·grikgipa biap damdokara, Gizang, Tarabari, Boklapara, Khanapara-Pilingkata, Ratacherra, aro Hahim ong·skaachim.
Ia meligrikna man·jaenggipa damdok biaprangoni sq km 18.51-ko Assam aro sq km 36.79-ko Meghalaya ra·na gita songgigrikahachim.