TURA: West Garo Hills a·jani a·kawe jolrango Federation of Electricity Distribution Company (FEDCO)-ni bijoli on·anirang namjaengani a·sel jolo songdongenggipa manderang neng·nikanirangko chagrongna nangtokenga ine All Meghalaya Minority Students Union (AMMSU) parakatenba, ia jolrango bijoli on·aniko a·dok sorkarini Power department jako ra·piltaichina, a·dokni Power Minister AT Mondal-ko didiataha.
A·dokni Power Minister AT Mondal-na sedoatgipa chittio AMMSU-ni parakatani gitade, da·o gita wachini somoirango bijolirang nosto ong·e manderang neng·nikanirangko chagrongna nangtokengoba FEDCO-ni gita maming bosturangko aro dakchakanirangko on·jaengani giminan ia company-o kam ka·enggipa lineman aro gipinrangba kamrangko wattokengaha aro iani a·sel jolo songdongenggipa manderangsa neng·nikanirangko chagrongna nangtokskaenga.
“Ia jolrango bijoliko on·anirang namsrangjaengani gimin chinga suk ong·gija u·iatna nangao ga·akenga maina FEDCO-ni official-rang, kamo gisik nangjani gimin aro maming dakchakanirangko on·na sikjani giminan ia company-o kam ka·enggiparangba kamtangtangko wattokengaha. Ia company-o kam ka·giparang dongjani a·sel da·o jolo songdongenggipa manderangsa neng·nikanirangko chagrongna nangskatokengaha,” ine AMMSU-ni president Nur Islam, Power Minister-na sedoatgipa chittio parakataha.
Ia jolrango bijoli on·aniko FEDCO-na on·gija Power department-an ra·pilna nanga ine janapatengon, ia jolrango sorkarini jakchi bijoliko on·on batanggimin somoirango gita bijoliko nambate man·piltainaba gnang ine AMMSU, an·tangtangni ka·dongchakenganiko parakataha.
Ia jolrango bijoli on·aniko FEDCO jako ra·a intalan bijolini kajinarang tang·dobataha ine janapatskaengon, iandake bijolini bill-rangko nangana bate on·engani a·sel bang·bata nokdangrangan kajinarangko gamna man·jae neng·nikanirangko chagrongna nangtokenga ine AMMSU parakataha.