Science-o Laban Bengalee Boys, Commerce-o St Anthony’s skanggipa biapko man·a
SHILLONG/TURA: Ia 2025 bilsini Higher Secondary School Leaving Certificate (HSSLC) Arts Science, Commerce aro Vocational porikkani result-rangko Sombar salo parakataha aro ia bilsini Science porikkao Shillong songjinmani Laban Bengalee Boys’ Higher Secondary School aro Commerce-o St Anthony’s Higher Secondary School skanggipa biaprangko man·e chu·sokgipa ong·aha. Ia bilsini HSSLC Arts porikkao St Edmund’s Higher Secondary School, skanggipa biapko man·e chu·sokgipa ong·skaaha.
HSSLC Arts porikkao Top 10-ni skanggipa biapko Shillong St Edmund’s HS School-ni Albert Mate aro Idawanplishisha Swer, 455 marks-rangko man·e sualgrikaha indiba gnigipa biapko Nongpoh-o donggipa St Paul’s HS School-ni Nelly Mary Khymdeit (451 marks) aro gittamgipa biapko St Anthony’s HS School-ni Safilia Wahlang (450 marks) man·rikskaaha. Ia chang HSSLC Arts porikkani Top 10-o Tura Don Bosco College (Hr Secondary Section)-ni Neev Sharma-ba 448 mark-rangko man·e, brigipa biapko ra·rikaha. St Edmunds HS School-o poraienggipa Nangrim Mangsang Sangma-ba 446 mark-rangko man·e, Top 10-o bongagipa biapko man·e pass ka·aha.
Ia chang HSSLC Arts porikkako a·dok gimikni sak 22835 candidate-rang seaha aro ianoni sak 18736 candidate-rang pass ka·e, pass ka·ani percentage gimik 82.05 gapaha.
HSSLC Arts porikkao district-ni gita pass ka·ani percentage-ranga East Garo Hills-o 72.68%, West Garo Hills-o 68.86%, South Garo Hills-o 66.01%, East Khasi Hills-o 91.18%, West Khasi Hills-o 89.70%, Ri Bhoi-o 84.62%, South West Garo Hills-o 64.53%, North Garo Hills-o 64.55%, South West Khasi Hills-o 77.41%, East Jaintia Hills-o 90.16%, Eastern West Khasi Hills-o 92.70% aro West Jaintia Hills-o 85.20% ong·aha.
Ia bilsini HSSLC Science porikkako a·dok gimikni sak 3922 candidate-rang seskaaha aro ianoni sak 3253 candidate-rang pass ka·e, pass ka·ani percentage 82.94 gapangskaaha.
HSSLC Science porikkani Top 10-o Laban Bengalee Boys’ HS School-ni Saptarshi Bhattacharjee, 483 mark-rangko man·e skanggipa biapko man·aha, uni ja·man St Anthony’s HS School-ni Drishana Roychoudhury 477 mark-rangko man·e gnigipa biapko man·skaaha aro St Anthony’s HS School-ni Shweta Sharma, 473 mark-rangko man·e gittamgipa biapko man·skaaha. Tura Don Bosco College (Hr Sec Section)-ni Samridhya Das-ba 450 mark-rangko man·e, Top 10-ni chikkinggipa biapko man·rikpaaha.
Science stream-o district-ni gita pass ka·ani percentage-ara, East Khasi Hills-o 86.73, West Khasi Hills-o 96.00, Ri Bhoi-o 85.63, West Garo Hills-o 73.61, East Garo Hills-o 63.57, South Garo Hills-o 82.35, South West Khasi Hills-o 68.57, West Jaintia Hills-o 88.75, East Jaintia Hills-o 96.15, North Garo Hills-o 68.69, South West Garo Hills-o 100.00 aro Eastern West Khasi Hills-o 79.03 percent ong·aha.
Indake ong·engon, ia bilsini HSSLC Commerce porikkako a·dok gimikni sak 2501 candidate-rang seaha aro ianoni sak 2033 candidate-rang pass ka·e, pass ka·ani percentage 81.28 percent gapskaaha.
Commerce stream-ni Top 10-o St Anthony’s HS School-ni Disha Chokhani, 481 mark-rangko man·e skanggipa biapko man·aha, uni ja·man Laban Bengalee Boys HS School-ni Nishan Talukdar 476 mark-rangko man·e gnigipa biapko man·skaaha aro Laban Bengalee Boys HS School-ni Dipankar Barua, 468 mark-rangko man·e, gittamgipa biapko man·skaaha. Commerce stream-o Garo Hills-oni saksaba Top 10-o biapko man·rikjaha.
Commerce stream-o District damprakni gita pass ka·ani percentage-ara, East Khasi Hills-o 83.69, West Khasi Hills-o 92.3, Ri Bhoi-o 75.77, West Garo Hills-o 67.26, East Garo Hills-o 83.33, South Garo Hills-o dongja, South West Khasi Hills-o 76.36, West Jaintia Hills-o 85.39, East Jaintia Hills-o 92.45, North Garo Hills-o 64.1, South West Garo Hills-o 38.46 aro Eastern West Khasi Hills-o 88.29 percent ong·skaaha.