SHILLONG: Meghalaya a·dokni dingtang dingtang biaprangona rel ramarangko taribaani bidingo chanchirimna gita pilak political dolrangni tom·aniko ong·atanio Congress dolba bak ra·jana tik ka·angaha.
Iana skang, Opposition dolrangoni Voice of the People’s Party (VPP)-ba pilak political dolrangni tom·anio bak ra·pajana tik ka·angahachim.
Rel project-rangni bidingo political dolrangni tom·e chanchirimanio bak ra·pajana tik ka·aniko parakatengon, sorkarini iandake rel project-na committee-ko songaniara, iandakgipa kamrango pilak dolrangkon bak ong·atenga ine sorkarini dakmesokanisan ong·aia maina je kamrangon uamang an·tangari chanchina man·ja uandakgipa kamrangnade sorkari, gipinrangkosa matnangrongskaa ine Bristibar salo, Meghalaya Pradesh Congress Committee (MPCC)-ni secretary Manuel Badwar parakataha.
“Ia committee-o Congress dolde maming dakeba bak ong·jawa maina je kamrangon uamang (sorkari) an·tangari kamrangko chu·sokatna man·ja, uandakgipa obostaosa gipinrangkoba bak ong·atna jotton ka·ronga. Indiba ian nama ong·ja,” ine Badwar, kobor ra·timgiparangna aganaha.
Badwar-ni aganani gitade, a·dokna nangchongmotgipa bang·a kamrangon sorkari, iandake pilak party-rangni committee-rangko songronggija an·tangtangsa jekoba ja·ku de·rongaiachim.
“Uamang da·o membor-rang bang·batengani giminsa pilak kamrangkon an·tangtangni skani gita dakna jotton ka·ronga. Uni gimin ia kamoba MDA sorkari, an·tangtangni nangnikani gitan ja·kuko de·aichina. Iandake maming ja·kurangko de·na man·jaengmiting somoirangosan uamang gipinrangkoba bak ong·atna jotton ka·ronga. Uni gimin ia kamoba Congress dolde bak ong·pajawa. Ian uamangni bilgrianiko mesokanisa ong·a,” ine ua aganaha.
Kamrangko ka·dilchina gitasa a·dokni manderang, MDA-ko sorkari chalaina on·aha ine janapatskaengon, “Uamang an·tangtangan ia kamko ka·dilchina aro uamangni kamrang ong·ama ong·ja, uko chinga nigen. Pilak party-rangni committee-ko songanichi uamang maiko miksongenga? Ian dingtang dingtang kamrango manderangko aro pilak dolrangkon bak ong·atenga ine uamangni dakmesokanisan ong·aia. Kamrangko ka·dilchina gitasa manderang, uamangko seokaha, uni gimin uamang an·tangtangan kamko ka·aichina,” ine Badwar parakataha.
Rel project-ni bidingo chanchirimna pilak party-rangni committee-ko songna tik ka·engani gimin sing·doatengon, “Joa kal·chakgipa casino-rangni gimin chanchianio uamang pilak party-rangni committee-ko songachimma? Dongja. Simarango ong·enggipa golmalrangko namatna kam ka·anio uamang pilak party-rangni committee-ko songachimma? Dongja. Indide da·o rel project-ni gimin chanchianiora maini gimin pilak party-rangni committee-ko songna nangenga?” ine MPCC-ni secretary sing·doataha.
Meghalaya a·doko, mongsongbate Khasi-Jaintia Hills a·jarango rel project-rangko dingtang dingtang dolrang jegaltokengani gimin a·dok sorkari, iani bidingo pilak party-rang baksa tom·e chanchirimna aro uni ja·man a·dokni gipin dolrang baksaba tom·e chanchirimna manchiengachim ine nikna man·a.