TURA: Be·enni gita cholgri ong·gipa manderangna sorkarini on·enggipa dingtang dingtang scheme-rangko on·na man·na gita adita salrangna skang, Disability Awareness program-ko West Garo Hills a·jao donggipa New Bhaitbari-ni Special Education & Training Centre-o ong·atangaha aro ia program-ko ong·atanio, West Garo Hills a·jani Deputy Commissioner Vibhor Aggarwal, mongsonggipa sokgipa ong·e bak ra·angaha.
Ia program-ko ong·atanio, West Garo Hills a·jani District Social Welfare Officer Madonna Onasis T Sangma, Selsella ICDS Project-ni Lady Supervisor-rang aro gipinrangba bak ra·angtokaha.
Ia program-ko ong·atanio New Bhaitbari jolrango be·enni gita cholgri ong·gipa sak 150-mangni gita manderang bak ra·angtokaha aro ia tom·anio, Handicapped Welfare Association-ni secretary Amir Hussain, rimchaksoani kattarangko aganangaha.
Ia program-ko ong·atanio, West Garo Hills a·jani Deputy Commissioner Vibhor Aggarwal, jinmana aganprakengon, be·enni gita cholgri ong·gipa manderangkoba songsalo mande ra·na nangani gimin aro pilak kamrangon bak ong·ate, uamangni man·gnirangko on·na nangani gimin aganangaha.
Iana skang, ia program-ko ong·atani bidingo West Garo Hills-ni District Social Welfare Officer Madonna Onasis T Sangma, jinmana agan-talataniko on·angengon, Social Welfare department-ni ning·o be·enni gita cholgri ong·gipa manderangna ra·gatgipa dingtang dingtang scheme-rangni gimin talatanirangko on·angaha.
Be·enni gita cholgri ong·gipa bi·sarangna class I-onin scholarship, book grant, uniform grant, conveyance allowance aro uandakgipa cholrangko on·enga ineba Sangma aganaha.
Be·enni gita cholgri ong·gipa manderang, jemangan bilsi 37-ni ning·o ong·kuenga aro jemangan class XII-ko pass ka·e chubata gadangrango poraijaha, uandakgipa manderangna Unemployment Allowance-ko on·enga ineba Sangma parakataha.
Be·enni gita cholgri ong·gipa manderangna ICDS office-oni CM Care Scheme-ko on·enga ineba ua aganaha.
