SHILLONG: A·doko adita bilsirangna skang Congress-ni sason ka·mitingo somoio, Congress baksa bakrimitingo bobil dolna tangka-paisarangko on·e dakchakaha ine Deputy Chief Minister, Sniawbhalang Dhar-ni kosako HNLC bobil dolni matnanganiko UDP jegalaha.
Je mandeni kosakoba matanganirangkode dakna man·aia indiba matnanganirangna sakkiko mesoke on·na man·na nanga ine UDP dilgipa Titosstarwell Chyne mejalo aganaha.
Dhar-ni kosako HNLC bobil dolni matnangani a·selrangko sandiatna nangama ine sing·anina aganchakengon, bobil dolni matnanganiko mongsonggipa ine sorkari nikode, uade A·dok Sorkarini skaosa pangchaka ineba Chyne aganaha.
Indake ong·engon, “mamla nangchongmotgipa ong·jaode maina unara aganaba agangrikgen” UDP dilgipa saksa aganaha.
Unomitingo an·tangni kosako HNLC bobil dolni matnanganirang tol·gipasa aro maming sakki gri ine Deputy Chief Minister Sniawbhalang Dhar-ba jegalman·aha.
Bobil dolna tangka-paisarangko on·e dakchakaha ine HNLC, unaskango Dhar-ni kosako kattarangko parakahachim.
Unigisepon, bobil dolni ong·katatgipa kattarangni bidingo VPP, National Investigating Agency (NIA)-chi sandiatchina aroba Dhar-ko Cabinet-oniko ra·galchina gitaba dabiahachim.
