TURA: Garo Hills Autonomous District Council (GHADC)-o chartered accountant (CA) ine tol·gipa mandeko gong kror 8-na consultant-ni kamo rakkienga ine Tura-ni MDC Bernard N Marak-ni matnangatani ja·man GHADC-o Goods & Services Tax (GST)-ni kamrangko niroknagipa officer-rang dongjani giminsa tax-ni bidingo u·i-ma·sigipa Sumit Kumar Jain Bohra-ko consultant aro advisor dake rakkiaha ine Budbar attamo, GHADC-ni Executive Membor (EM) Taxation I/c Grahambell A Sangma talataniko on·ataha.
“Tribal area-rango namroro silroroani kamrangna ma·mong sorkarioniko man·soenggipa tangka paisarangna GST-ko nangani bidingo adita salrangna skangsan ong·kataha. Uandaken iani bidingo nambate talataniko on·china Tax official-rango sing·sandiaha aro GST-ni kamrangko Taxation official-rangna mesoke on·na man·na gita Sumit Kumar Jain Bohra-ko consultant aro adviser dake kamo rakkiaha,” ine GHADC-ni EM parakataha.
GST-ni kamrangna a·paloni consultant-ko rakkianio maming ong·gijani dongja ine talataniko on·angengon, da·o dipet GHADC-ni payroll-o tax professional-rang dongkujani giminsa Bohra-ko consultant aro adviser dake rakkina nangaha ine GHADC-ni EM Taxation I/c parakataha.