BAJENGDOBA: North Garo Hills a·jani Bajengdoba C&D Block ning·o donggipa Raja A·pal sub-centre-o sanna banani cholrang chu·ongjaengani a·sel centre-o kam ka·enggipa manderang aro songni manderangba neng·nikanirangko chagrongna nangtokenga ine A·chik Holistic Awakening Movement (AHAM) Bajengdoba regional unit parakatenba, ia sub-centre-ko namdapatchina, a·dokni Health Minister Ampareen Lyngdoh-ko didiataha.
AHAM Bajengdoba regional unit-ni president Kollingworth D Sangma-ni parakatani gitade, ia Raja A·pal sub-centre-ni ning·o dam 12-na baten songrang pangchaktokenga indiba ia sub-centre-o sanna banani cholrang chu·ongjaengani a·sel indita songni manderangna sanna bananirangko on·anio neng·nikanirangko chagrongna nangenga.
“Jolo songdongenggipa manderang aro sub-centre-o kam ka·enggipa manderangni badi ka·anirangko man·soe chinga AHAM-ni membor-rang, ia sub-centre-ona re·ange nion, ia centre-o chirangba chu·ongjaenga, staff room, public toilet-rangba dongjae neng·nikanirangko man·tokenga ine nikna man·aha. Una agreba, 2022 bilsio sanction ka·gipa labour/delivery room-koba da·onan matchotkujaenga aro jakkalgija donchipkuenga ine chinga nikna man·aha,” ine AHAM Bajengdoba regional unit-ni president, Health Minister-na sedoatgipa chittio parakataha.
Dam 12-na baten songni manderang, ia sub-centre-o pangchaktokengani gimin ia sub-centre-ko ta·raken namdapatna nangenga ineba AHAM Bajengdoba regional unit-ni president, a·dokni Health Minister-ko didiataha.