SHILLONG: Meghalaya a·doko Common University Entrance Test (CUET) Undergraduate (UG) 2025-ko chatro chatrirang sena man·na gita Shillong-o damgittam centre-rangko man·dapaha.
Ia centre damgittamara, ge 70 Computer node donggipa Shillong-ni St Mary’s Higher Secondary School, ge 100 computer node donggipa Shillong College aro ge 29 computer node donggipa Shillong ITI ong·a.
Iani bidingo kobor ra·timgiparangna u·iatengon, “CUET-UG-ko chatro chatrirang sena man·na gita a·doko Computer donggipa centre-rangko bariatna chinga National Testing Agency baksa agangrikjringenga aro centre-rangko bariatanio NTA-ba nanga gita dakchakanirang on·enga,” ine Sukrobar salo, Education department-ni Commissioner & Secretary Vijay Kumar Mantri parakataha.
Ia centre-rangko a·doko man·dapahani gimin chel·a biaprango CUET-ko sena donata man·gipa chatro chatrirangba da·o a·doktangon sena cholrangko man·gnok ineba ua aganaha.
NTA-oni u·iatani gitade, May 19 tarikoni a·bachengenggipa CUET-UG-ko gimik sak 11,309 candidate-rang sena sienga aro ianoni sak 1376 candidate-rangde Guwahati-ni centre-rango aro bangki candidate-rangde da·o Meghalaya a·dokni centre-rangon sena man·gnok.
CUET-UG-ko sena gita chatro chatrirang da·ode Guwahati-na agre gipin chel·gipa biaprangona re·angna nangjawaha ine janapatengon, May 19 tarikoni a·bachengatenggipa CUET-UG-ko pilak candidate-rangan Shillong, Tura ba Guwahati-on sena gita tikatmanaha ine Mantri parakataha.
Centre apjitani bidingo candidate-rangna NTA, email ba message-rang gita u·iatmanaha ineba ua aganaha.