TURA: Tura-ko Winter Capital songchina dabienggipani bidingo songni nokni dilgiparangna aro jinmana agan-talatanirangko on·na gita Sukrobar salo, A·chik State People’s Front (ASPF)-ni chang 11-gipa tom·bimonganiko West Garo Hills a·jani Chokchokia kal·chakramo ong·atangaha.
Ia tom·aniko, jolo donggipa dingtang dingtang songni Nokmarang baksana Rajabala jolni Garo Student Union (GSU), A·chik Progressive Approach (APA), Garoland State Movement Committee (GSMC), aro Federation of Khasi, Garo & Jaintia People (FKGJP) dolrang baksa bakrime ong·atangaha.
Ia tom·aniko ong·atani bidingo ASPF-ni general secretary Bernita Marak, jinmana talate on·angengon, Tura-ko Winter Capital songaniara Meghalaya a·dokko man·e on·dilanggipa pagitchamrangni ku·rachakgimin kattarangan ong·a aro iani bidingo A·chik a·songni manderangna u·iatna aro ia dabianio bakrimaniko on·china didina gita ASPF, Garo Hills-ni pilak biaprangon awareness program-rangko ong·atenga ine parakataha.
Jowai-ko Summer Capital songchina gita Jaintia Students Union (JSU)-ni dabiskaenggipani bidingo janapatengon, ia dabianio ASPF-ba JSU-na chakpaaniko on·enga ine Summer Capital-ko Shillong-oniko Jowai-ona apjitatskachina Marak, a·dok sorkariko didiataha.
Ja·mano Chokchokia songni Nokma, jinmana mittelpilani kattarangko agane, Nokgipa Isolko mittelpilenba ia tom·aniko matchotataha.
