Phulbari: A·doko Jal Jeevan Mission (JJM) project-ni kamrango chu·sokgijanirangko bang·en nikna man·engon changsatai Achik Dedicated Integrity Leaders (ADIL), project-ni kamko jako ra·gipa company-ni kosako ja·ku de·china dabie West Garo Hills district-ni Demdema C&RD Block-ni ning·o ga·akgipa Chandigre songo JJM-ni kamrang matchotgija dongengani gimin badi ka·aha.
Chandigre-o JJM project, Kaimbatapra Water Supply Scheme (WSS)-ni ning·o ga·aka, project-ni chu·gimik korosara kror 18.64 ong·a. Website-o mesokani gita songo chu·gimik ge 117 nokdangrang donga, gimik nokrangonan Functional Household Tap Connections (FHTC)-ni gita chiko sale on·aha.
Report-ni gita, Kaimbatapra WSS-ko da·onaba matchotkuja, indiba project-ni tangka kror 18.45-kode contractor-na on·manjok.
ADIL-ni aganani gita, Chandigre songoni manderangni badi ka·ani ja·man uamangni team ba dolko nirok-sandina wataha, songni manderang maidakgipa neng·nikarangko chagrongenga iako nieaha.
Nirok-sandina songona re·ange niangaon, songni ge 117 nokdangrangoni ge·saba chi tingtotsakon man·jaenga ine nikna man·aha.
“Nokantiona re·ange niaon te·sa nokoba chi man·ako nikea dongja. Company-ni ia indake simsakgija kam ka·aniko ra·chakna man·jawa, uni gimin department-ko ia project-ko name dake nirokatchina mol·mola.
Iarangni gisepon CSO, Minister aro daitko jako ra·gipa department-ko project-ni kamrangko name dake nirokchina mol·molangaha.
“Songni manderang rongtalgipa chiko man·a kraa, uni gimin company-ni simsakgija kam ka·aniko ra·chakna man·ajwa ine ADIL agandapaha.
