Tura: Garo Hills Autonomous District Council (GHADC)-ni saksa tax consultant-ko rakkiani bidingo Tura MDC, Bernard Marak uni matnanganiko dontongkuja, Sumit Kumar Jain Bohra-ko tax consultant dakenba GHADC-ni rakkianiara, indigita skia pora gnanggipa A·chik chadamberangko cha·boka ga·aka ine Marak matnange aganaha.
GHADC-ni saksa tol·gipa chartered accountant-ko kror 8-na batpile rakkianiara ian Garo Hills-ni skia pora man·gipa chadamberangko cha·bokani ong·aia, jemangan office damantiona re·roroe an·tangmangna kragipa kamrangko sanditokenga. Unigimin GHADC-ni A·chik chadamberangko nikchange kam ka·aniara A·chik a·songni skia-poraia man·gipa chadamberangko cha·boka ga·akchong·mota. Tura MDC aganaha. Uni matnange aganani gitade, Jain Class X-kosan pass ka·aia aro intermediate-ko matchotja.
‘‘GHADC-ni Chartered Accountant (CA) dake rakkigipa Jain-ara class XII -kon matchotja, indiba Council-ko sason ka·enggipa MDC-rangko official-rangko tol·e cha·na man·enga, jemangan uko appoint ka·aha. GHADC-o sasonko jakkepenggipa MDC-rang, commers degree dongpilgipa Garo graduate-rangko baseani pal, Class XII pass ka·gijagipakosa kamo rakkipila. Indake uamangni daka kamara A·chik chadamberangko cha·boka ga·akchongmota’’ ine Tura MDC matnange aganaha.
Tax consultant-ni kamko ka·na gita komibeoba bachelor degree donggipa ong·na nanga aro kamo jaksapgiminrang ong·na nanga aroba business administration, economics, finance ba ugita gipin nangchapgipa kamrangko dake ka·e ma·sigimin ong·na nanga, indiba SK Jain-de indonga mamingba donga” ine Bernard Marak matnange aganaha.
