RESUBELPARA: 2025 Batch-ni MCS Trainee Officer-rang Sombar salo, North Garo Hills a·jaona re·angenba, sorkarini kamrangko ma·sie ra·na gita North Garo Hills District Administration-ni administrative official-rang baksa tom·aniko ong·atangaha.
Ia MCS Trainee officer-rangna, North Garo Hills a·jao salgnini training aro exposure program-ko ong·atenga aro ia program-ni ning·o MCS trainee officer-rangna district aro block-ni gadango ka·enggipa kamrangni giminba skie on·enga.
Ia tom·anio North Garo Hills a·jani Deputy Commissioner Abhishek Saini aro Additional Deputy Commissioner-rangba dongpae bak ra·angaha.
MCS Trainee officer-rangna rimchaksoani kattarangko aganangengon, North Garo Hills a·jao maikai sorkarini kamrangko chalaia aro maikai songadam nokadamrango kamrangko ka·a, uarangni bidingo Deputy Commissioner agan-talatanirangko on·angaha.
Songo noko ong·enggipa obostarangko ma·sie ra·na gita field study-ko dakna nangani gimin janapangengon, sorkarini kamrangko chu·sokatanio songni nokni manderangna dangdike on·anian MCS officer-rangni mongsonggipa daito ong·a ine Saini aganaha.
Tom·a matchotani ja·man MCS trainee officer-rang, SP office, Mendipathar police station aro Women police station-onaba re·ange, niam retirangko rakkiani bidingo skie ra·eaha.
Uni ja·man Mendipathar Industrial Growth Centre aro Varun Beverages Pvt Ltd-onaba MCS trainee officer-rang re·ange, karkanarangko chalaiani bidingo official-rang baksa agangrikangaha.
