TURA: Rongram-oni Jitherson A Sangma, police officer saksani kosako Director General of Police (DGP), Meghalaya-na badi ka·aha.
Jitherson Sangma, Suchority R Marak aro Prosanjit Barua -mang sakgnini kosako lak 20 damni jewellery ba gamchatgipa ro·ongniko tarigipa gananirangko, lak 50 tangka, uni garage-ni lekkarang, bi·sarangni insurance passbook aro almirah-ni chabiko cha·uangani gimin mamlako segataha.
Indake meja bilsi November jani 11 tariko uni bolgni gariko (ML08 L 0931 aro AS-01 RC-1649) cha·uani giminba mamlako segattaiaha. Uni ja·man police officer Benzer Marak, case-ko ba mamlako nirokatna Jitherson Sangma-oniko lak 3 tangka dabiaha. Indiba Sangma, tangka on·na jechake ua officer-ni kosako mamlako segatskaha.
Sub-Inspector (SI) Marak, mamlako sandigija donchipani gimin Sangma, West Garo Hills-ni Superintendent of Police (SP)-na badi ka·skaha.
“Je officer-ni kosakon mamlako segatahachim ba badi ka·ahachim ua officer-kon da·onaba case-ni investigating officer donkuenga. Uni gimin ia bilsini April jao I/O-ko bodolchina mol·molaniko on·ahachim indiba da·onan maming aganchakaniko man·kujaenga’ ine Sangma parakaha.
Minggipin investigating officer Benzer Marak, uni kosako mamlako segatani gimin ua da·ode Sangma-ko duk-neng·nikatatanirangko on·skaenga.
“Basakoba angko, basakoba ang manager aro ang ma·ako okamtaitaie statement ra·e dongenga. Uni personal numbor-chi phone ka·ate chingko sing·sandiao bak ra·chian okamtaitaie chingko neng·nikatenga ine Sangma agankuaha.
Indake ong·engon Sangma, DGP-na badi ka·anio SI, uni nokona, business chalaigipa dokanona re·basime chingko kenatenga ine janapaha.
“Officer-ni iandakgipa kamrangara chingko kenanio janggi tangna draatenga. Ian namen jajrengani ong·a ine agane Sangma, DGP-ko ia mamalko nirokatchina mol·molaha.
