SHILLONG: Unlawful Activities (Prevention) Act (UAPA)-ni ning·o, a·doko bobil dake chakatenggipa Hynniewtrep National Liberation Council (HNLC) dolni kosako champengataniko bilsi bongana ra·dodapattaiaha.
Iani bidingo u·iataniko on·angengon, HNLC kosako champengataniko ra·dodapna gita UAPA Tribunal-o chu·onga gitan sakkirangko nikmanaha ine parakataha.
“India a·songni kosako chakatna HNLC bobil dol, silchidarerangko jakkale ong·gija kamrangko ka·engkuani gimin bobil dolni kosako champenganiko ra·doaniara kraanian ong·a,” ine UAPA tribunal-ko dilenggipa Justice Soumitra Saikai, UAPA Tribunal-ni ge·etaniko on·anio parakataha.
Union Home Affairs Ministry aro UAPA tribunal, 2000 bilsini November jaonin HNLC bobil dolko UAPA-ni ning·o champengatenga aro iana skang 2024 bilsini November jaoba bobil dolni kosako champengataniko ra·dodapatahachim.
Home Affairs Ministry-ni parakatani gitade, HNLC bobil dol, salgro salaram jolo bobil dake chakatenggipa United Liberation Front of Asom (ULFA-I)-ko man·chape dingtang dingtang bobil dolrang baksa bak ong·kuenga.
HNLC bobil dol, Meghalaya a·dokni dingtang dingtang biaprango, bomarangko gopretanio, tangka dabie ra·anio aro dingtang dingtang dakgipa ong·gija kamrangko ka·anio jak donga ineba MHA parakataha.
2019 bilsini November jaoni aro 2024 bilsini June jaona kingking, HNLC bobil dolni sak 73 manderangko sipai dolrang rim·na man·aha ineba MHA parakataha.