TURA: World War I (WWI) ba a·gilsak gimikni skanggipa dakgrikanio kamrangko dakchakna gita France a·songona re·anggipa Garo Labour Corps-rangko man·chape salgro salaram jolni dingtang dingtang Tribal Labour Corps-ni bidingo Wanphrang D Diengdoh-ni tarigipa ‘Because We Did Not Choose’ jawilwatko Sonibar attamo, Tura-ni District Auditorium-o mesokangaha.
Ia jawilwatko Tura-ni dingtang dingtang dolrang nangrime mesokaha aro ia jawilwatara, a·gilsak gimikni skanggipa dakgrikanio, Garo Labour Corp-rangko man·chape salgro salaramni dingtang dingtang Tribal Labour corp-rangko British-rang rimanganio, ia manderangni gipin a·songo on·gilpaani aro dakchake on·anirangko bang·bata manderangan gualtokaha ba mitamrang dal·e ra·jahani giminsa ia jawilwato, A·chikrangko man·chape Tribal pagitchamrangni on·gilpaaniko manderangna aro mongsongbate chadamberangna ma·siate on·na miksonganio tarigipa jawilwat ong·a.
“Ia jawilwatko mesokaniara, A·chik pagitchamrangni on·kanganiko chadamberangna mesoke on·anisan ong·aigija adita salrangna skang Tura-o donggipa cenotaph-ko pe·galani ja·man Garo Labour Corps Day-ko maniani gamchatani bidingo ma·siate on·na aro manianio bakrimchina didianiba ong·a,” ine Tura-ni Joint NGOs Forum parakataha.
Ia jawilwatko mesokna gita dakchakanirangko on·ahani gimin NGO-rang, a·dokni Chief Minister aro a·dok sorkarikoba mittelpilangaha.
Ia jawilwatko mesokatani ja·man, ia film ba jawilwatko tarigipa Wanphrang Diengdoh, video conference gita aganprakatengon, uni ru·uta bilsina tarigipa jawilwatko niahanina mittelangpilaha.
WWI-o kam dakchakegipa Tribal-rangni bidingo tarigipa jawilwatko mesoka
Date:
Share post:
