SHILLONG: Tura Medical College & Hospital-ko chalaina gita chu·gimik bilrangkode private company-na on·na miksongani dongja ine Sombar salo, a·dokni Chief Minister Conrad K Sangma talataniko on·angaha.
Tura Medical College aro Hospital-ara sorkarini gaman ong·aigen ine janapatengon, ia college-ko chalaianisan private company-ni jako ong·aigen ine Chief Minister talataniko on·angaha.
Ia medical college-ni pilak bosturangan a·dok sorkarinian ong·gen ineba ua aganaha.
Chief Minister-ni aganani gitade, a·doko kamni gimin ma·sigipa professional-rang dongjani a·sel ia college-na professional aro doctor-rangko ra·anio neng·nikanirangko chagrongna nangengani gimin Tura Medical College aro Hospital-ko chalaianio neng·nikanirangko man·na nangengachim.
“Ia college-ni bang·bata seat-rangkon Meghalaya-ni chatro chatrirangna kanggen aro bang·gija seat-rangkosan private management-na on·e, ia college aro hospital-ko chalaian baksana medical college-o kam ka·enggiparangni dormaharangkoba uamangan tarigen. Ia hospital-ko sorkarini bak gitan chalaigen,” ine Sangma, Mendipathar-o ong·atanggipa program-o jinmana aganprakengmiting somoio parakataha.
Ia medical college-ni skanggipa academic session-ko 2026-2027 bilsina nisan ka·enga aro NMC-ni pilak niamrang, skigiparangko ra·ani aro nipiltaianirangkoba dakengaha ine Chief Minister aganaha.
Ia college-o a·dokni chatro chatrirangkode ‘state quota’-ni ning·on ra·gen ine janapatskaengon, mitam seat-rangsa ‘management quota’-ni ning·o ong·na siengani gimin private management nirokanggen ine Sangma parakataha.
Medical college-rangko chalaianio, Medical Council-ni niamrangko raken ja·rikna nanga ine janapatengon, college-ni skigiparangna kam ka·gimin aro kamni gimin ma·sigiminrangsa ong·na nanga ine Chief Minister aganaha.
Chief Minister-ni aganani gitade, a·doko sorkarini chalaienggipa hospital-rango specialist-rang chu·ongjaengani a·selan Shillong Medical College-na professional-rangko ra·anio chu·ongjahani gimin Tura Medical College-ko sorkari aro seoka man·gimin private company nangrime chalaina tik ka·aha. Indake ong·genchimoba Tura medical college-ko chalaianio private company-de chu·gimik bilrangko man·jawa ineba Sangma aganaha.
Hospital-kode State Health Department-ni ning·on chalaiangkugen aro salantini kamrangkoba sorkarian nirokangkugen ine Chief Minister talataniko on·angaha.
 |
ReplyForward
|