TURA: Indian Council of Agricultural Research (ICAR)-ni gita India a·song gimikon ‘Viksit Krishi Sankalp Abhiyan’ (VKSA)-ko May 29 tarikoni June 12 tarikona ong·atna siengani gimin West Garo Hills a·jaoba ia VKSA program-ko Krishi Vigyan Kendra (KVK), District Agriculture Office, District Horticulture Office, District Animal Husbandry department aro Central Agricultural University (CAU) baksa nangrime ong·atna sienga.
Ia campaign-ni ning·o Garo Hills gimikni dam 108-mangni gita songrango donggipa sak 16,200-mangni gita game ge·e cha·gipa manderangona sokatna miksongenga.
Ia VKSA program-ko ong·atanio salantian KVK-ni Subject Matter Specialist saksa, ICAR institute-oni scientist saksa, CAU-ni saksam District Agriculture-ni saksa, District Horticulture-ni saksa aro Animal Husbandry department-oni saksa dake official-rang, song damgittam ka·e grongegen aro game ge·e cha·giparangna agan-skie on·anggen.
Ia VKSA campaign-ko ong·atani miksonganiara, gama ge·anio jakkalgipa gital kolrangko aro gital bitchilni rokomrangko ma·siate on·na, Soil Health Card-rangko jakkalani gamchataniko u·iatna, sorkarini dingtang dingtang scheme aro policy-rangko u·iatna, game ge·e cha·giparangni u·i-ma·sianirangko knatime ra·na aro uandakgipa kamrangan ong·a.