SHILLONG: Meghalaya a·doko Inner Line Permit (ILP)-ko ra·gatchina dabianio chakpaaniko on·e 2019 bilsion Meghalaya Legislative Assembly, resolution-ko pass ka·ahaoba da·o bilsidok ong·angpilahaonan ILP-ko man·e on·chipkujaengani gimin NPP-chi dilenggipa Meghalaya Democratic Alliance (MDA) sorkariko Khasi Students Union (KSU) matnangataha.
ILP-na resolution-ko ra·aoni da·o bilsidok ong·angpilengahaoba kamrangko chu·sokatna man·kujaengani gimin sorkariko matnangatengon, iani bidingo gisiko nangbate kamko ka·china KSU, a·dok sorkariko didiangaha.
Meghalaya a·doko ILP-ko ra·gatna man·chipkujaengani gimin suk ong·gijaniko parakatengon, iandakmiting somoio a·dokna Meghalaya Residents Safety & Security Act (MRSSA)-ko ra·gatskana nangchongmotenga ine KSU-ni president Lambokstarwell Marngar parakataha.
Meghalaya a·doko gipin biaprangoni napsrukanirangko champengna maming niamrang dongjani a·selan gipin biaprangoni manderang, a·dokona altuaen re·napbana man·tokenga ineba Marngar aganaha.
“Ian dingtangmancha a·doko songdongenggipa Tribal manderangnasa kenchakna nangbatengani gimin namen simsakna nangchongmotenga,” ine KSU president aganaha.
Meghalaya a·dokara Mizoram, Tripura, aro Assam-ni mitam a·jarangonaba re·pak dopakgipa rama gita ong·engani gimin ILP gita dakgipa niamrangko ra·gatanio ra·bianirang ong·skaengon, iarangni bidingo sing·anirangna name aganchakchina gitaba KSU, a·dok sorkariko didiangaha.
KSU-ni parakatani gitade, Meghalaya a·dokara Sixth Schedule, Land Transfer Act aro autonomous district council-rangni ning·o chel·chakako man·enggipa a·dok ong·a ine ma·mong sorkari chanchienga indiba uamang, Meghalaya a·doko ILP-ko ra·gatchina dabiangkuaigen.