Rongjeng: Viksit Krishi Sankalp Abhiyan-ni bak gita Sonibar salo Dambo Rongjeng Block Office-o awareness & empowerment programko ong·ataha. East Garo Hills-ni Team C-ni ong·atgipa ia programo sak 150 baten game ge·e cha·giparang bakko ra·aha. Program-o sorkarini on·gipa scheme aro gitalgipa game ge·e cha·ani cholrangni gimin skie on·angaha.
Programo bak ra·na sokgipa game cha·giparangko biming segatachi a·bachengaha, uni joljol mongsonggipa sokgiparangko mande ra·e rimchaksoaha. East Garo Hills-ni a·gipin scientist Dr. S. M Hussain, programona sokbagiparangko rimchaksoaha.
Rongjeng Assembly Constituency-ni MLA Shri Jim M. Sangma, mongsonggipa sokgipa ong·e bakko ra·angaon, sorkarini game ge·e cha·giparangna kam ka·engani gimin aganaha. Indake game cha·giparangko VKSA programo gisik nange bakko ra·enba expert ba u·i-ma·sigiparang baksa agangrikchina didiaha.
Una agre programo gipin official-rang jekai- District Agriculture Officer, District Horticulture Officer, aro District A.H & Veterinary Officer- uamangba aganprakangaha. Dr. Jyoti V. Vastrad, College of Community Science, Tura-ni Dean, programo mongsonggipa sokgipa ong·e bakko ra·enba, game cha·giparangko mongsongbate me·chikrangko joltango ge·e man·gipa bosturangko nambatate damrangko bariatchina didiaha. Uandake ge·a gamanio gisik nanggiparangko college-o ong·atgipa training program-rango bakko ra·china didiaha.
Apsan daken South Garo Hills-oba Krishi Vigyan Kendra (KVK), Sonibar salo mikka wagenchimoba Viksit Krishi SankalpAbhiyan (VKSA) campaign-ko ong·atangaha. South Garo Hills-ni Gasuapara C&RD Block-ni ning·o ga·akgipa dam 9 songrango mikka waanichi a·a rurongdapaha.
Indakgipa obostaoba team, dingtang dingtang songrang jekai- Mangkenggre, Ramchengga, Dimagre, Bandapara, Cherangpara, Bilkona, Gandugre, Makapuripara, aro Kolapara-ona sokangaha.
Mikka wagenchimoba campaign-ko chu·sokataha.
