Uamang baksa nikgipa tourist sak 3-ko sandichina didia
SHILLONG: Madhya Pradesh a·doko donggipa Indore songjinmaoni bia ka·daldale re·bagipa tourist sakgni, chong·motan Raja aro Sonam Raghuvanshi-ni gimaaoni da·o sal 16 ong·pilengahaoba, jikgipa Sonam-ko police-rang da·onan man·pilkujaenga. Segipa Raja-ni sogimin manggisikode re·anggipa June 2 tarikon Sohra jolo donggipa a·kuang damsaoniko man·ahachim.
Indita salrangni ja·manba gimaenggipa me·chikko man·pilkujaengani gimin Madhya Pradesh a·dokni manderang, Meghalaya Police-ko matnangtokengon, ia me·chikkoba sandienggipa dingtang dingtang dolrangba, dontonggijan ia me·chikko sandiskakuenga.
Ia a·selko maikai ma·sina man·gen, iani bidingo Meghalaya Police-ni mitam official-rango sing·sandiaton, Raja aro Sonam-ko Mawlakhiat-chipakna re·angengmiting somoio tourist sakgittam baksa nikrikahani gimin ia sakgittam tourist-rangkon skanggipa ma·sichengna nangenga aro ia tourist-rangko ma·sina gita May 21 aro May 23 tarikni gisepo Shillong aro Sohra-ni hotel-rang aro resort-rangona re·bagipa tourist-rangni gimin name am·sandina nanggen ine official-rang parakataha.
“Pilak hotel aro homestay-rangon sokgiparangni ID card-rang baksa biming aro address-rangko see rakkiani gimin ia jiksesa baksa nikgipa tourist sakgittamko rim·nade hotel aro homestay-rangoniko am·sandina nangenga,” ine official aganaha.
Raja aro Sonam-ni bidingo aro uamangni nokdangrangni bidingo name am·sandie ra·na gita a·dokni police dol ba special investigating Team (SIT)-ni official-rang, Indore-ona re·angna nangenga ineba ua ku·pattianiko on·angaha.
Una agreba, ia jiksesani Guwahati songjinmao dongbagipa hotel-rangona re·ange, uamangni gimin sing·sandichina gitaba official, a·dokni police dolrangko didiataha.
Sonam-ko Bangladesh a·songona badingsrukangani cholrang donga inako jegalatengon, me·chikko iandake a·song damgnini sima gita rimanganide altua katta ong·ja ine official parakataha.
“A·song damgnini sima gita uko rim·anganide altua ong·ja. Uko rim·gittange Bangladesh a·songona rim·anggenchim ong·ode da·o una tangka dabianirang sokbagnokchim,” ine ua aganaha.
Mikka waanirangchi gimaenggipa me·chikko sandianio neng·nikanirangko man·tokengoba police-rang dontonggijan uko sandikuenga indiba Madhya Pradesh a·dokoni social media-rango Meghalaya police aro sorkariko matnanganirang batroroskaenga ine nikna man·a.