SHILLONG: Kilometre 29.03 ong·gipa Tura Bypass ramako tarina ma·mong sorkari, gong kror 961.27 tangkarangko chamataha aro ia Bypass-ko matchotahaode ian Tura songjinmao gari gorarangni apchangket ong·aniko komiatna dakchakgnok.
Iani bidingo, Union Road Transport & Highways Minister Nitin Gadkari, social media-o jinmana u·iatengon, ia Tura Bypass ramara NH-127B aro NH-217 ramarangko nangdimeatgen aro ia ramako 2-lane dake tarigen ine parakataha.
Union Minister-ni parakatani gitade, ia Tura Bypass-ko NH-127B ramao donggipa Sanchonggre song sambaoni a·bachenggen aro NH-217 ramao donggipa Jenggitchakgre songo naegen.
Ia Tura Bypass ramako tarianio Ballonggre, Upper Damalgre, Rongbakgre aro Gambegre songni a·arangko ra·na nangnaba gnang ine niksamsoengani gimin adita bilsirangna skangan a·dok sorkari, ia songrangni Nokmarang aro gipin dilgiparang baksa tom·e, a·arangko ra·ani bidingo chanchisamsoahachim ine nikna man·a.
Ia ramana South West Garo Hills a·jani adita songrang, chong·motan Ballonggre, Upper Damalgre, Rongbakgre aro Gambegre songrangonikoba km 6.350 bakroe man·chapengachim.
Da·o dipet Tura songjinmao Bypass ba pekwatgipa ramarang dongkujaengani a·selan dal·dalgipa garirangkode walni somoirangosa watna nangtokengachim.