TURA: West Garo Hills a·jani Demdema C&RD Block-o Scheduled Tribe (ST) category-oni ong·gijagipa aro joltangni ong·gijagipa candidate-rangko Block Resource Person (BRP)-ni kamna ra·aniko Rajabala-ni NGO-rang jegalatani ja·man Selsella Block Resource Centre (BRC)-oba Tribal ong·gijagipa aro joltangni ong·gijagipa candidate-rangko BRP-ni kamna ra·ahani gimin Selsella jolo donggipa dingtang dingtang NGO-rang, chong·motan GSU, FKJGP, ADE, ASWA, NGCO, ANYO, GSMC aro ACHIK dolrangni nangrime bikotgipa All Selsella NGOs Alliance (ASNA) jegalataha.
Iani bidingo West Garo Hills a·jani District Mission Coordinator (DMC)-ba badi ka·e sedoatengon, Selsella BRC-o BRP-ni kamna seoka man·gipa manderangara, Selsella jolo songdongenggipa manderangba ong·ja aro ST gadangoniba ong·jani gimin jolo songdongenggipa manderangni nangnikani gita ong·jaenga ine ASNA parakataha.
“Selsella jolon lekka pora donggipa aro kamni gimin u·i-ma·sigipa chadamberang bang·en donga aro ia kamrangko man·na kraa. Joltangni ong·gijagipa aro ST category-ni ong·gijagipa candidate-rangko Selsella BRC-ni BRP-na seokaniara joltangni manderangkon nichanggalani gita ong·enga,” ine ASNA parakataha.
Selsella-o BRP-ni kamna ra·gipa candidate sakgniko ra·galpilenba, gital dake candidate-rangko seokpiltaichina West Garo Hills a·jani DMC-ko didiatengon, Selsella-o atchikame songdongkamgipa aro A·chik candidate-rangna skanggipa cholrangko on·chengchina ASNA dabiangaha.
Ia dabianiko knachakjagenchimode, tom·tomao jingjengatanirangko dakna draatako man·gen ineba ASNA mikrakataniko on·angaha.