SHILLONG: Khasi Hills Autonomous District Council (KHADC)-ni ning·o donggipa Public Accounts Committee (PAC)-ni report-ko Sukrobar salo, Council-ni Chairman Strong Pillar Kharjana-na on·angaha.
Ia report-ko PAC-ni Chairman Titosstarwell Chyne, committee-ni gipin membor-rang, chong·motan, Juristman Iawphniaw, Denzil R. Chen, Eddieson Kharumnuid, Grace Mary Kharpuri aro Ricky Shullai-ni mikkango, KHADC-ni Chairman-na on·angaha.
Ia report-ko on·anganio, Legislative Wing-ni Secretary aro PAC-ni Member Secretary Balentine Sohtun-ba dongpaaha.
2020 bilsini March 31 tariko bon·gipa bilsina Comptroller and Audit General (CAG)-ni sandie man·ani, ku·pattiani aro am·sandianirangko nipilna gita ia committee-ko songahachim.
Report-ko on·angani ja·man kobor ra·timgipa manderang baksa agangrikengon, re·baenggipa June 24 tarikoni a·bachengenggipa KHADC-ni summer session-ona ia report-ko ra·angengani gimin da·o dipet ia report-ni bidingo parakna man·kujawa ine PAC-ni Chairman Chyne aganaha.
CAG-ni report-ko nipilna gita PAC-ni tom·aniko changbongana ong·ataha aro dingtang dingtang department-rangni talatanirangko ra·aha ineba ua aganaha.
“District council-o chu·onggijanirangko aro CAG-ni report-o mesokgipa chu·sokgijanirangko maikai namatna man·gen chinga department-rangna ku·pattianirangko on·aha,” ine Chyne parakataha.
Chyne-ni aganani gitade, CAG-ni ku·pattianirangna mai dakgipa ja·kurangko de·aha, uarangko KHADC-ni dingtang dingtang department-rangba talate on·aha.
Ma·mong sorkarini on·atgipa tangka paisarangko jakkalsretaha aro dingtang dingtang kamrangna ra·anio niam gita ong·jaha ine CAG-ni mesoke on·aniko iana skang, PAC-ni chairman talatangaha.