TURA: Sukrobar salo, a·dokni Chief Minister Conrad K Sangma, West Garo Hills a·jani Selsella C&RD Block ning·o donggipa Rengmagre songona re·anganio, songni chadamberangna doka dam·ani bosturangko suale on·angaha.
Chief Minister-ni parakatani gitade, jasamangna skang uni Masangpani songona re·angmitingo ua chadamberangni cricket kal·ako nike songni kal·chakramo neng·takangon, songni kal·chakramko tarie on·china aro doka dam·ani bosturangko on·china chadamberang mol·molatahani gimin ia salni bako ua cholko ra·e, songni chadamberangna doka dam·ani bosturangko sualangaha.
Social media, drugs, chu aro uandake ong·gija kamrango an·tangtangni somoirango bon·ataigija, doka dam·ani, kal·susaani aro uandakgipa kamrango an·tangtangni somoirangko on·china gitaba Sangma, songni chadamberangko didiangaha.
Songni kal·chakramko taridapna gita ua Chief Minister’s Special Development Fund-oniko gong lak 8-mangni gita chamataha aro iachi ia kal·chakramo goal post aro gipin nanga kamrangko ka·anggen ineba Chief Minister parakataha.
Iani bidingo dingtangmancha CM Connect session-koba ia songo ong·atangaha aro songni manderangna an·tangtangni neng·nikani aro nangnikanirangko aganna gita somoirangko on·angaha.
Ia session-ko ong·atanio Agriculture, PHE, MeECL, Health aro uandakgipa dingtang dingtang department-ni official-rang bakko ra·enba, manderangni sing·anirangna aganchakanirangko on·angaha.
Ia tom·anio, Selsella constituency-ni MLA Arbinstone B Marak-ba aganprakengon, ia songona re·bae, songni manderangna pilak nanga dakchakanirangko on·ahani gimin a·dokni Chief Minister-ko mittelpilangaha.