SHILLONG: Meghalaya a·dokni dam 46 block office-rangko nambate rikna gita a·dok sorkari, gong kror 180 tangkarangko chamatmanaha ine Bristibar salo, a·dokni Community & Rural Development (C&RD) Minister AT Mondal parakataha.
Bristibar salo, Ri Bhoi a·jani Bhoirymbong aro Umling C&RD Block-ni gital office-rangko nokdonggae on·angani somoio iako Minister parakataha.
Mondal-ni aganani gitade, block office-rangko nambate tarianichi, songni nokni manderangna ta·rakbate aro nambate sorkarini kamrangko dangdike on·na man·gen.
Ri Bhoi a·jao gital rikgipa damgni block office-rangko da·o gital chasongni kolrangchi rikaha aro ian songadam nokadamrango manderangni neng·nikanirangko olgrokatna sorkarini jako ra·e ka·enggipa kamni bak ong·a ine Minister aganaha.
Ia block office damgniko, a·dokni Chief Minister Conrad K Sangma, songni nokni dilgiparang, MLA-rang aro sorkari official-rangni mikkango nokdonggae on·angaha.
Bhoirymbong C&RD Block complex-ko kror 4.5 koros ong·e rikaha aro ia office-ni dal·aniara square metre 1930 ong·e, iano e-service counter-rang, training aro conference hall-rang, self help group-rangni bosturangko palna gita showroom aro solar power-rangba donga.
Ia Bhoirymbong block office-ko 1965 aro 1971 bilsirango Indo-Pakistan war-o dangdike on·anggipa war veteran Colbert Shadap-ni jakchi nokdonggae on·angaha.
Iani ja·man, Umling C&RD Block-ni office complex-koba nokdonggae on·angaha. Ia office-ko rikna 1980 bilsion propose ka·ahachim indiba da·o bilsi 45-ni ja·mansa kror 5 korosrangchi matchotna man·aha. Ian Umling Block-ni ning·o donggipa dam 224 songrangna dangdike on·anggnok.
Ia block office-rangko nokdonggae on·anganio a·dokni Chief Minister Conrad K Sangma-ba jinmana aganprakengon, iandakgipa project-rangchi sorkarini kamrangko manderangona sepangbatatna man·gnok ine parakataha.
Batanggimin bilsisnini gisepo a·dokni dingtang dingtang office-rang, skulrang aro hospital-rangko rikna gita sorkari gong kror 2500-na baten chame on·aha ineba Sangma aganaha.
 |
ReplyForward
|