SHILLONG: Indore songjinmaoni re·bagipa tourist Raja Raghuvanshi-ko Sohra jolo so·otanina uni jikgipa Sonam, uni mikchagipa aro gipin sakgittam manderangko rim·aha gitan Garo Hills-oba, Raksamgre Sub-Division-ni ning·o donggipa Rengigre songo, Pirot R Marak minggipa mandeko so·otani mamlao uni jikgipa Nennen R Marak, uni mikchagipa Reknan K Sangma aro gipin sakgni manderangko Tikrikilla-ni police-rang rim·aha.
Koborko on·ani gitade, ia a·sel re·anggipa April 15 tarikon ong·aha indiba May-ni 7 tariko, sianggipa mandeni jong-ada Oman Marak, uni siani bewalko chanchichipe, Tikrikilla police station-o FIR ka·ani ja·mansa ia a·sel jinmani mikkango parak ong·aha.
FIR-o parakani gitade, sianggipa Pirot Marak, Renggigre songni Nennen Marak-ko bia ka·e dongengachim indiba ia me·chik, apsan songonin bilsi 41 ong·gipa Reknan K Sangma baksa sel·e roskaaha. Uamangni mikchagrikaniko ma·drangrangsan ong·aigija songni manderang pilakan ma·sitoka ineba FIR-o janapaha.
Ia me·chik, salbrina kingking Reknan baksa seke kataoni April 14 tariko noktangona re·bapilon, me·chik aro me·asa dolgnini ma·drangrangan uamangni nokona re·bae, uamangko namgrikate donangahachim.
Indake ong·genchimoba, ma·drangrangni tom·e uamangni nokoni re·angpila bakan Pirot-ni siani koborko uni jikgipa, Pirot-ni ma·drangrangna u·iataha.
Uni siani ja·man, uni manggisiko uamangni nok janggilon gopaha.
Indake ong·genchimoba, Pirot-ni sianiko ra·chakna man·jae, jasamangni ja·man sianggipa mandeni ma·drangrang police-rangna FIR ka·aha aro uandaken police-rang, uni siani a·selko sandirokna gita uni manggisiko June 12 tariko bilpilaha. Uni manggisiko post mortem ka·on, ia mandeni gitoko rim·gekani chinrang aro uni asol ronggni bakan binekaha ine ma·sina man·aha.
Post mortem report-ko police-rang, June-ni 22 tariko man·soaha aro bakan sianggipa mandeni jikgipa, uni mikchagipa aro gipin sakgni manderangkoba police-rang rim·aha.
