Int’l Day Against Drugs Abuse and Illicit Trafficking-ko manianga

SHILLONG/TURA: A·gilsakni gipin biaprango gitan Meghalaya a·dokni dingtang dingtang biaprangoba, International Day Against Drug Abuse & Illicit Trafficking-ko Bristibar salo, “Breaking the Chain: Prevention, Treatment and Recovery fo All” ine katta bichongko done maniangtokaha.
Shillong-o ia program-ko Meghalaya a·dokni Social Welfare department, Meghalaya Police, Meghalaya AIDS Control Society aro Drug Reduction, Elimination & Action Mission (DREAM) baksa nangrime, Shillong songjinmani State Convention Centre-o ong·atangaha aro ia program-o a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia program-ko ong·atanio a·dokni Chief Minister, jinmana aganprakengon, pekatgipa samrangko warachakaniosan ong·aigija, sam jakkalgipa manderangna an·seng baljokaniko on·anichi, lekka porako on·anichi aro chadamberang baksa agangrikjringanichi simsak nirokanirangkoba on·na sorkari kam ka·enga ine parakataha.
DREAM program-ara sam jakkalani aro badingsrukaniko champengna sorkarini ra·gatgipa program ong·a aro ia program-ni ning·o a·dok sorkari, toromni gita aro dingtang dingtang gittimni gita chalaienggipa rehabilitation centre-rangko dakchakna gong crore 50 tangkarangko bilsi bongana pakwate on·ataha ineba ua aganaha.
Ia DREAM program-chian a·dok sorkari, manderangna mikrakatanirangko on·na aro sanna bananirangko nangenggiparangna dakchakna gita village council-rang, chadambe dolrang, self help group (SHG)-rang aro dingtang dingtang torom dolrang baksaba bakrime kamko ka·enga ineba ua aganaha.
Ia DREAM program-ni bak gita a·dok sorkari, dingtang dingtang skulrangna, skigiparangna, gittimrangna aro NGO-rangna dakchakanirangko on·na gitaba a·songo niksenggipa Society for Promotion of Youth & Masses (SPYM) baksa Memorandum of Understanding (MoU)-o soi ka·grikangaha.
Ia tom·anio a·dokni Chief Minister, dingtangmancha National Nasha Mukt Bharat Abhiyan-ni bak gita jinma ku·mikchetanikoba dakdilangaha.
South West Garo Hills a·jaoba Social Welfare department, DLSA aro District Sankalp Hub baksa nangrime ia International Day Against Drug Abuse & Illicit Trafficking-ko Multi-Facility Centre-o ong·atangaha.
Ia tom·anio, SWGH a·jani Deputy Commissioner Hema Nayak, jinmana aganprakengon, South West Garo Hills a·jao sima ari damgni donga, chong·motan Bangladesh aro Assam, uni gimin sima arirang gita pekatgipa bosturangko badingchiwalna chol ra·naba donga ine aganenba, songsalni manderang sakantikon mikrake aro drugs-oni an·tangtangko chel·ate dongchina didiangaha.
Ia tom·anio, SWGH a·jani Additional Superintendent of Police, Sengrikchi N Marak-ba jinmana aganprakengon, drugs ba pekatgipa ringa cha·aniara jakkalenggipa mandenasan namgijani ong·aija indiba ian nokdangni mandena songsul noksulna aro songsalnaba namgija bimungko ra·baa. Unigimin iandakgipa namgijagipa drugs jakalaniko bon·atna sakantian bakrimna aro ku·mongna ine ua aganangaha. Ia campaign-ona Songni Nokmarang, NGO, SHG aro chatro chatrirang sak 130-na baten re·bae damsan bak ra·angtokaha aro jinma signature campaign-oba bak ra·angaha.
Apsan daken, West Garo Hills a·jaoba District Social Welfare Office baksana Adil Gandhian Society aro Sankalp-Hub baksa bakrime ia programme-ko Captain Williamson School Daldagre-o ong·atangaha. Ia program-o District Social Welfare Officer, Madonna Onasis T. Sangma, Nasha Mukt Bharat Abhiyan-ni gimin talate on·angenba, ia campaign-ko songsalo skulrango ong·ate drugs jakkalaniko bon·atna ku·monge kam ka·na sakantikon mol·molangaha.
East Garo Hills a·jaoba ia program-ko East Garo Hills a·jani Police department, District Sports Office baksa bakrime drugs ba pekatgipa ringa cha·aniko jakkalaniara kenbegni ong·ako mikrakatani gita ong·atangaha aro ia program-ko ong·atani bak gita me·a aro me·chikrangna km 10 katsusaanikoba ong·atangaha. Ia katsusaanio chegiparangna boksis baksa certificate-rangkoba on·angaha.
West Jaintia Hills-oba marathon-ko “Run Against Drugs Abuse and Illicit Trafficking” ine miksonganiko done Jowai-o ong·atangaha. Ia katsusaanio bang·bea chadamberang bak ra·angaha aro chegiparangna boksis-rangkoba on·angaha.