Sal 6-na police-rangni jako kachari pakwatata
SHILLONG: Indore songjinmao bading chiwale cha·gipa Raja Raghuvanshi-ko Sohra jolo so·otani case-o Madhya Pradesh a·doko rim·ako man·gipa mande sakgittam, chong·motan Silome James, Balbir Ahirbar aro Lokendra Singh Tomar-ko Bristibar salo, Meghalaya Police-ni Special Investigation Team (SIT), Shillong-ona rimbaaha aro ia mande sakgittamko Chief Judicial Magistrate-ni kachario mikkangpaatani ja·man saldokna police-rangni ning·o donchina kachari rai on·ataha.
Rim·a man·gipa sakgittam manderangoni Silome James-ko police-rang, Sonam Raghuvanshi-ni bag-oniko pistol, guli aro tangkarang baksana ma·manti sakkirangko ra·galahani gimin rim·aha.
Balbir Ahirbar, jekon ‘Ballu’ ineba mingklakachim, ian Sonam Raghuvanshi-ni dongnuchakgipa noko security guard-ni kamko ka·gipa ong·skaachim aro ia mande, Sonam-ni re·ruraanirangko name ma·sina nanga ine police-rang, sing·sandina rim·skaaha.
Police-rangni rim·gipa gittamgipa mandeara Indore songjinmao Sonam-ni dongchakgipa nokni nokgipa Lokendra Singh Tomar ong·skaa aro uko Meghalaya Police-ni SIT, Gwalior-oniko rim·ani ja·man Shillong-ona rimbaaha.
Silome James-ko rim·ani ja·man police-rang Budbar salosan, Indore songjinmao donggipa chiring dilsaoniko pistol pongsa, magazine ge·gni aro .32 guli ronggniko baksana gong 50,000 tangkarangkoba man·aha.
Indore songjinmao rim·ako man·gipa Silome James, Budbar salpaksachibara police-rangko chiring dilsaona rimangaha aro ua biaponiko pistol aro gulirangko man·aha. Ia mandeo sing·sandiangkuon ja·mano uni I10 garionikoba gong 50,000 tangkarangko man·aha.
Ia tangkarangko ua, Sonam-ni mikchagipa Raj Kushwaha-ni laptop bag-oniko ra·aha ine James ku·rachakaha.
Iani bidingo talataniko on·angengon, laptop bag-kode so·e galakosa man·aha indiba laptop-kode man·kujaenga ine East Khasi Hills a·jani SP Vivek Syiem parakataha.
Syiem-ni aganani gitade, ia laptop-ko Silome James an·tangan ramasamchi galangaha ine ku·rachakaha indiba da·o dipet ia laptop-ko man·pilkujaenga.
Adita salrangna skangsan Meghalaya Police-ni SIT, Indore songjinmani MR3 Hare Krishna Vihar minggipa biapo wa·al so·gimin bag ge·sako man·ahachim aro ia bag-on gong lak 5 tangkarang, pistol, Sonam-ni phone aro Raja-ni ma·manti gam-jinrangba dongachimkon ine police-rang chanchichipani ong·kataha.
Batanggimin salrangonin Meghalaya Police-ni SIT, tangka paisa aro ma·manti gam-jinrang donggipa bag baksana Sonam-ni mobile phone aro pistol-koba sandiengachim. Sohra-o Raja-ko so·otani ja·man Sonam, Madhya Pradesh a·dokona re·angpile Indore songjinmani nok te·sao dongnuchakahachim aro ia nokon ua an·tangni bag-koba donangahachim. Raja-ko so·otanio jak donggipa Raj Kushwaha aro gipin manderangko police-rang rim·aha ine ma·siani ja·man Sonam, June-ni 8 tariko, an·tangni dongnuchakenggipa nokoni ong·kate, June-ni 9 tariko, Uttar Pradesh a·dokni Ghazipur-o bame on·eaha.