SSLC porikkako February/March jaon ra·kuchina sorkariko didia
TURA: Ia bilsi dipet Secondary School Leaving Certificate (SSLC) porikkako December jao ong·atna sorkarini tik ka·aniko Garo Students Union (GSU) jegalatenba, SSLC porikkako December jao ong·atna skang, dingtang dingtang skulrang, mongsongbate songadam nokadamrango donggipa skulrang, ma·a paarang aro dingtang dingtang dolrang baksa name chanchirimchengchina gita a·dok sorkariko didiataha.
Iani bidingo a·dokni Education Minister Rakkam A Sangma-na sedoatengon, ia 2025-2026 bilsi dipet SSLC porikkako December jao ong·atna tik ka·aniara dingtang dingtang skulrango poraienggipa chatro chatrirangna, mongsongbate songadam nokadamrango donggiparangna neng·nikanirangko ra·baani gita ong·gen ine GSU parakatenba, SSLC porikkako December jao ong·atna skang, dingtang dingtang skulrang, ma·a paarang aro chatro chatrirang baksaba name chanchirimchengchina didiataha.
“SSLC porikkako December jao ong·atna tik ka·aniara, chatro chatrirangna supplementary porikkarangko sena chol on·e, lekka porani gadangko namdapatna ja·ku de·anian ong·enga ine chinga ma·sia indiba iako dakanichi skulrango poraienggipa chatro chatrirangna, mongsongbate songadam nokadamrango donggiparangna neng·nikanirang ong·naba gnang,” ine GSU-ni president Zikku Balgra N Marak parakataha.
GSU-ni parakatani gitade, da·o dipet India a·song gimikon CBSE, ICSE ba uandakgipa gipin board-rangba porikkarangko December jao ra·a dongkuja aro Meghalaya a·doko board porikkako December jao ra·aniara national standard-o academic calendar-ko ma·ekata gita ong·e, admission-rangko ra·anio aro dingtang dingtang competitive exam-rangko sena chatro chatrirangni tarisamsoanirangoba neng·nikanirangko chagrongna nanggen.
“SSLC porikkako December jao ong·atgenchimode skulrango syllabus-ko October ba November jani a·bachengachipakan matchotna nanggnok aro ian songadam nokadamrango dongpagipa skulrangnade namen neng·nikani ong·gen,” ine GSU-ni president Zikku Balgra N Marak parakataha.
Board porikkana skang chatro chatrirangko ka·dongbatatna gita revision, class test aro pre-board porikkarangko ong·atna nanga ine janapatengon, Board porikkako December jao ong·atgenchimode chatro chatrirangna iandakgipa tarisamsoanirangko dakna man·jawaha ine GSU parakataha.
December jao Meghalaya a·dokni bang·bata biaprangan, mongsongbate Khasi aro Jaintia Hills a·jarang namen sin·ani gimin December jao SSLC porikkako ong·ataniara chatro chatrirangna namen neng·nikani ong·gen ineba GSU parakataha.
SSLC porikkako December jaon matchote chatro chatrirang, gital academic session-na April ba May jarangona sengna nanggenchimode jabri jabongamangnade chatro chatrirang maming dakna nanganirang dongjawaha aro ian chatro chatrirangko ong·gija kamrango dilsretani cholrang donga ineba GSU mikrakataniko on·angaha.
“Uni gimin chinga Education department-ko songadam nokadamrango poraienggipa chatro chatrirang, skigiparang aro ma·a paarang baksa chanchirimchenge, uamangni nangnikanirangkoba knatime ra·china nangnikenga. Chatro chatrirangni, skigiparangni aro pilakni namgninan SSLC porikkako pangna dakrongbaenga gitan February/March jao ra·e, Supplementary porikkako May/June jao ra·china chinga sorkariko mol·molenga,” ine GSU-ni president Zikku Balgra N Marak, Education Minister-na sedoatgipa chittio janapataha.