SHILLONG: Sima jolrango ong·enggipa obostarangni bidingo Meghalaya sorkari, re·baenggipa August 15 tariko, Assam sorkari baksa Memorandum of Understanding (MoU)-o soi ka·anggen aro uni ja·man Ri Bhoi a·jani ning·o donggipa song dambongako Meghalaya a·dokona ra·bapilgen ine Sukrobar salo, a·dokni Cabinet Minister aro MDA-II sorkarina ku·wattimgipa Paul Lyngdoh parakataha.
“August-ni 15 tariko chinga, Assam sorkari baksa MoU-o soi ka·anggen aro uni ja·man Ri Bhoi a·jao donggipa dambonga songrang an·chingona re·bapilgnok,” ine Lyngdoh, kobor ra·timgiparangna aganaha.
Ia song dambongako Meghalaya a·dokona man·bapilenganiara, ru·utbea bilsirangna a·dok damgnini simarango ong·enggipa golmalrangko namatna kam ka·anio mingsa chu·sokani gita ong·enga ineba Cabinet Minister aganaha.
Dingtang dingtang gadangrango, a·dok damgnini dilgiparang, tom·tomaniko rakkina agangrikanirangko dakengoba, sima jolrango a·dok damgnini manderang, dinggrikanirangko nikna man·engani gimin janapatengon, ia neng·nikanirangko namatna gita sorkari ta·raken cholko man·gnok ine Cabinet Minister Lyngdoh parakataha.
Langpih jolrangni bidingo janapatskaengon, dingtang dingtang songrangona re·e am·sandiani kamrang matchotmanaha aro da·o Assam-ni dilgiparang baksa apsan ia songrangona re·e songni manderang baksa agangriknasan nangaiaha ine West Khasi Hills regional committee-ni dilgipa Lyngdoh aganaha.
“Ia jolrango donggipa songrangona re·e manderango sing·sandianirangko dakmanaha aro da·o Assam a·dokni dilgiparang aro official-rang baksa apsan ia songrangona re·e agangrikanirangko dakna nangkuenga,” ine ua aganaha.
Lapangap jolrangona Assam sorkarini napdrabae kam ka·anirangko aro manderangni kosako sinjetaniko champengna maming kamrangko ka·jaenga ine a·dok sorkarini kosako matnanganirangko jegalatskaengon, ia jolrango pangnan sorkari, chel·chakgipa sipai dolrangko aro sorkari official-rangkoba donatenga ine Lyngdoh parakataha.
“Chinga ia jolrango songdongenggipa manderangko chel·chakna maming kamrangko ka·jaenga ong·ode ia jolrangona police dolrangko ba magistrate-rangko watatgenchimma? Uni gimin sorkarini kosako iandake matnanganiara kraani ong·ja,” ine Lyngdoh aganaha.