SHILLONG: Bobil dake chakatani a·sel champengako man·gipa Hynniewtrep National Liberation Council (HNLC) bobil doloni sakgni memborrang Eastern West Khasi Hills district-ni Superintendent of Police-na an·tangtangko bame on·eaha.
An·tangtangko police-na bame on·egipa bobil dolni memborrangara Dibarius Jyrwa (32) aro Ridor Lyngdoh Nonglait (30) mang ong·a, uamang sakgnian Eastern West Khasi Hills-onin ong·achim.
A·bachengo uamangni ku·rachakani gitade Samuel Wahlang Pahsyntiew-ni dilanichi HNLC-o napangaha aro ja·mano Bangladesh-ona katnapangaha.
Pahsyntiew, jean batanggimin somoio Shillong Syndicate Bus Stand-o IED gopretatanio jak dongani gimin Shillong Sadar Police Station-o mokordoma ka·ako man·gipa ong·achimm, jekon da·oba rim·na gita sandienga.
Uamangni aganani gita, bobil dolo ja 15 mangna bakrimani ja·mao uamang HNCL-ni a·gipin dilgiparangni kamrangna suk ong·tokjaha, jeni a·selan uamang doloni ong·kate katbana draatako man·aha.
Police-ni aganani gitade uamang sakgni re·anggipa June 20 tariko Bangladesh-oni ong·katbaaha aroba bobil dolona uamangni napangani gimin skimpilanikoba uamang parakaha.
