SHILLONG: EventFAQs aro KPMG-ni WOW Awards Asia-o Meghalaya a·dok, Pan-Asian Award minggniko cheaha ine Sukrobar salo, a·dokni Tourism Minister Paul Lyngdoh parakataha.
Lyngdoh-ni parakatani gitade, ‘Special Event of the Year (Government)-na Shillong Cherry Blossom Festival 2024, Gold-ko cheaha aro ‘Festival of the Year (Culture)’ category-o Me·gong Festival-ba Gold-ko cheskaaha.
“Ian Meghalaya a·doko festival ba manianirangko ong·atani biterang ong·a aro iako anga da·alo na·simangna u·iatna namen katchabea,” ine Lyngdoh aganaha.
Ia bilsini Shillong Cherry Blossom Festival-ko re·baenggipa November jani 14 aro 15 tarikrango ong·atanggen ineba Tourism Minister parakataha.
2024 bilsio a·dokni dingtang dingtang festival-rangko ong·atna a·dok sorkari, gong kror 23.5 tangkarangko koros ka·aha aro gong kror 133.42-ko man·pilskaaha ineba Lyngdoh aganaha.
Ia festival-rangko ong·atanio, lak 3.86-mangni gita gipin biaprangoni manderang re·bae bak ra·angtokaha ineba ua aganaha.
“Ia sal somoirango gipin a·songrangoni manderang, Meghalaya a·dokona re·baanirang batroroengaha. India a·songni pilak biaprangonin, mongsongbate Maharashtra aro Odisha a·dokrangoniba bang·en tourist-rang a·dokona re·baenga. Silrorengmangmangon gong kror 16.8-na baten man·dapanirangko nikaha aro taxi-rangchiba kror 5.38-mangni gita tangka paisarangko man·dapaha,” ine Tourism Minister aganaha.
Festival-rangko ong·atanichi Shillong aro Sohra-o hotel aro uandakgipa dongchakani biaprangoba 100% ong·aha ineba ua aganaha.
Ia bilsini Shillong Cherry Blossom Festival-o America a·songoni mingsinggipa Jason Derulo, UK a·songoni mingsinggipa The Script aro uandakgipa dingtang dingtang gipin dolrangba gitrangko ring·e mesokangnasienga.
Ia chang Cherry Blossom Festival-ko Shillong-ona ra·angpile, mongsonggipa program-ko JN Stadium aro gipinrangko MFA Ground aro SRGT Ground-rango ong·atnasienga.