SHILLONG: Meghalaya a·dokona niam gri napsrukanirangko aro gipin biaprangoni re·baenggipa Tourist-rangko nambate nirok sandina man·na gita dingtang dingtang dolrang Inner Line Permit (ILP)-ko ra·gatchina dabitokengon, sorkarini taridape ra·gatenggipa Meghalaya Residents Safety & Security Act (MRSSA)-kode ILP-ni pal ra·gatenga ong·ja ine Sukrobar salo, a·dokni Cabinet Minister aro MDA-II sorkarina ku·wattimgipa Paul Lyngdoh parakataha.
Adita salrangna skang, Madhya Pradesh a·dokoni re·bagipa tourist saksako Sohra jolo so·otani ja·man a·dokona re·baenggipa manderangko nambate nirok sandina man·na gita dingtang dingtang dolrang ILP-ko ra·gatchina dabiangtaiahani gimin Lyngdoh, ia kattarangko aganaha.
Sohra-o ong·anggipa a·selni ja·man, a·dokona re·baenggipa tourist-rang ong·gija kamrangko ka·na man·jana gita a·doko ra·gatgimin MRSSA-ko bilakbatatna Cabinet tik ka·angahachim.
“MRSSA-de ILP-ni pal ra·gatenggipa niam ong·ja maina MRSSA-de a·dokni ra·gatgimin niaman ong·a aro iani bidingo sorkari aro Assembly-ba baditaba chang jera ra·grikaha. Mingsa gita niatgenchimode ian ILP gita apsan dakgipa niamko ra·gatna miksongani ong·a maina MRSSA-ko ia chasongni niam tarigiparangan da·o nipiltaienba taridapaha,” ine Lyngdoh aganaha.
ILP-de Eastern Bengal Frontier Regulation-sa ong·a ine talataniko on·angskaengon, “ILP-o gitan MRSSA-koba somoini kri aro nangani kri taridaprorona gita Meghalaya Assembly-na bilko on·gen,” ine Cabinet Minister parakataha.
“Uni gimin iako anga a·dokni manderangna pakwatenga indiba an·chingo a·dokni niam donga, jekon an·ching je somoioba taridapna man·aigen,” ine Lyngdoh aganaha.
Meghalaya a·doko dingtang dingtang dolrangni dabienggipa ILP-ni bidingo ma·mong sorkari da·oba cholrangko niengkua ine adita salrangna skangsan External Affairs-ni Union Minister of State Pabitra Margherita parakatahachim.
“Salgro salaramni damchet a·dokrango ru·uta bilsirangna matchotgija dongkuenggipa kamrang da·oba bangki dongkuenga. Ia pilak nangnikanirangkon a·songni Prime Minister Narendra Modi-ni dilanichi mingsani ja·man mingsa dake chu·sokatenga,” ine Margherita aganaha.
Meghalaya a·doko ILP-na dabianikoba ma·mong sorkarini chu·sokatna miksongenggipa kamrango donenga aro iako somoi sokahaon ma·mong sorkari chu·sokatgen ineba ua ku·rachakaniko on·angaha.