RESUBELPARA: Micro, Small & Medium Entreprises (MSME)-ni bidingo North Garo Hills a·jani bading chiwalgiparangna agan-talatanirangko on·na gita Sukrobar salo, dingtangmancha Townhall Meeting-ko North Garo Hills a·jani Mendipathar Cooperative Society Hall-o ong·atangaha.
Bilsiantian International MSME Day-ko June-ni 27 tariko manirongani gimin ia tom·aniko ong·ataniara ia salko maniani bak gitaba ong·aha.
Ia tom·anio, RBI Shillong-ni General Manager O-i-C Olden Nongpluh, jinmana aganprakengon, jolo bading chiwalgiparangko, MSME-ni kamrangkoba jako ra·china didina aro bading chiwalani dingtang dingtang cholrangni bidingo chanchirimna gita ia tom·aniko ong·ataha ine parakataha.
Garo Hills-o Nokma Icecream-ni chu·sokgipa ong·engani gimin toe janapatengon, Garo Hills-o ma·manti bolam bite aro me·su samjakrangko bang·en man·ani gimin iandakgipa cholrangko ra·e bading chiwalanirangko dakna man·a ine Nongpluh aganaha.
Ia program-ko ong·atanio SIDBI aro MSME-ni official-rang, MSME-ko dakchakna ra·gatgipa dingtang dingtang scheme-rang, jekai Udyam registration-ni gamchatani, collateral free loan, Credit Guarantee Fund Trust for Micro & Small Entreprise (CFTMSE) aro Open Network for Digital Commerce gita dakgipa scheme-rangni gimin jinmana talatanirangko on·angskaaha.
Ia program-ko ong·atanio, SBI, MCAB aro MRB-ni official-rangba dongpae, bak ra·gipa manderangna dingtang dingtang kamrangni bidingo agan-talatanirangko on·angaha.