SHILLONG: People’s College Scheme-ni ning·o niamrangko pe·a ine Mendipathar College-ni kosako a·dokni Chief Minister-na RTI activist Cherian Momin-ni badi ka·e sedoanio biming ra·chapaniko, kamo rakkiako man·gipa me·chik sakgnide jegalataha.
Momin-ni badi ka·e sedoatgipa chittio biming mingako man·gipa skigipa sakgniara Cheanchi Marak aro Sengatchi Marak ong·achim aro ia skigipa sakgnini talataniko on·angani gitade, ia obostao uamang sakgnikode maming nangegija biming ra·ani gitasa ong·aiaha maina uamangde, iandake matnanganirango an·tangtangni bimingrangko on·na gitaba bilko on·jahachim.
“Chingna maming u·iatani gri aro chanchirimchengani gri ia matnanganio chingni bimingkoba ra·aha ine chinga knasona man·aha. Ia badi ka·anio chinga sakgnikode maming nangegija biming ra·asan ong·aiaha maina chingade People’s College Scheme-ni ning·o Mendipathar College-ko chalaienggipa Governing Body-ni kosako iandake badi ka·anirang dongjachim,” ine skigipa sakgni parakataha.
Ia skigipa sakgnini parakatani gitade, uamangko college-ni Governing Body, temporary aro substitute basis-osa kamoba ra·ahachim.
“Cherian Momin-ni badi ka·e seatani gita chinga sakgnide maming dakeba jegalani ba a·kangani ba chingni kamrangni kosako badi ka·anirangkoba daka dongkujachim,” ine skigipa sakgni parakataha.
Ia pilakan ma·sisretani a·selsa ong·aha ine talataniko on·angskaengon, Momin-ni badi ka·e seanio, uamangko biming man·chapani kakket ong·ja ine skigipa sakgni parakataha.