TURA: Tura Medical College-ko Public-Private Partnership (PPP) mode-o chalaina sorkarini tik ka·aniko Manipur a·dokni Imphal songjinmao donggipa Regional Institute of Medical Sciences (RIMS)-ni Association of Meghalaya Medical Students (AMMS)-ba raken jegalataha.
Iani bidingo a·dokni Chief Minister Conrad K Sangma-na sedoatengon, Tura medical college-ko PPP mode-o chalaigenchimode mikkangchi a·dokni chatro chatritrangna mai dakgipa nangchakeanirangko ra·bagen, uarangni bidingo janapatenba, iako Garo Hills-ni chatro chatrirang, ma·a paarang, skigiparang aro dingtang dingtang dolrangba jegaltokenga ine AMMS parakataha.
Garo Hills-o medical college-ko kulianiara jolni chatro chatrirangna, gipin biaprangona re·angna nanggijan biaptango donge poraina cholko on·ani gita ong·gnok ine sorkariko mittelpilangengon, ia medical college-ko sorkari chu·gimik jako ra·e chalaiani pal, PPP mode-osa chalaina tik ka·engani gimin AMMS, suk ong·gijaniko parakatskaaha.
“Chinga an·tangtangan medical-ko poraienggipa chatro chatrirang ong·e, an·tangtangni poraianirangkosan chu·sokataigija a·doktangni manderangna an·seng baljokaniko on·ani aro lekka porako on·anio dai nanggiparang ong·a,” ine AMMS parakatenba, Tura medical college-ko chalaianio private company-rangko bak ong·atna miksongengani gimin a·dok sorkariko sing·doataha.
AMMS-ni parakatani gitade, Tura Medical College-ko PPP mode-o chalaina tik ka·aniara National Medical Commission-ni sorkari medical college-rangna dongimin niamrango aro state quota-o seat kanganioba melijawaha maina sorkari medical college-rangode state quota-o a·doktangni chatro chatrirangna 85 percent seat-rangko donachim indiba PPP mode-ode 50 percent-kosan a·dokni chatro chatrirangna kangaignok.
Tura gita dakgipa biaprango medical college-ko kuliani miksonganiara chol ong·pagijagipa manderangna cholko on·anisa ong·engachim ine janapatskaengon, ia medical college-ko PPP mode-o chalaigenchimode ia namgipa miksonganirangkon pe·a gita ong·gnok aro man·dapanina miksonge kuliani gitasa ong·gnok ine AMMS parakataha.
Indake ong·engon, Tura Medical College-ko chalaiani bidingo name chanchipiltaichina aro Meghalaya a·dokni chatro chatrirangna chanchie ja·kuko de·china gita AMMS, a·dokni Chief Minister Conrad K Sangma-ko didiataha.