SHILLONG: Shillong songjinmani Khyndailad-o ma·manti bosturangko palbadinge cha·enggipa manderangko gipin biapona apjitna gita sorkari tik ka·ahani gimin Meghalaya High Court-ni songe on·gipa Special Officer, re·baenggipa July-ni 16 tariko dingtang dingtang dolrang aro police official-rang baksa tom·aniko ong·atna sienga ine Budbar salo, Shillong Municipal Board (SMB)-ni Chief Executive Officer (CEO) PK Boro u·iataha.
CEO-ni u·iatani gitade, Khyndailad-o ma·manti bosturangko palbadinge cha·enggipa manderangko apjitanio maming so·sojengjeng ong·anirang aro golmalrang dongjana gita hawkers association-ni general secretary, jolo songdongenggipa manderang aro police official-rang baksa agangrikchina Meghalaya High Court, Special Officer-ko songe on·ahani gimin ia tom·aniko ong·atenga.
Khyndailad-o badinge cha·enggipa manderangko apjitanio niamko ja·rikchina gita re·anggipa July-ni 3 tarikosan Meghalaya High Court, jolo songdongenggipa manderangna aro police official-rangna ge·etaniko on·angahachim.
Khyndailad-o badinge cha·enggipa manderangna dingtang biapko on·chenggija, uamangko a·rikgalna jotton ka·enga ine hawkers association, a·dok sorkarini kosako High Court-na badi ka·angani ja·man, ia kamko ka·anio niamko ja·rikchina aro skatang a·rikgaljachina gita High Court, ge·etaniko on·angaha.
Kacharini ge·etanirangko ja·rikatanio kamrangko nirokna gita Meghalaya High Court, Senior Advocate Subhasis Chakravarty-ko Special Officer dake songe on·aha.
Hawkers Association aro sorkari official-rang baksa chanchirimenba, Khyndailad-o badinge cha·enggipa sak 349 manderangoni badita sak licence-rang donga uko segatchina gitaba High Court, Special Officer-na ge·etaniko on·aha.