TURA: Tura-o manderangko salruraenggipa winger garirangko champengatani ja·man Dalu-oba apsan daken Baghmara aro dingtang dingtang biaprangoni manderangko salbaenggipa winger garirangko champengatahani gimin Tura-ni Sumo Winger Association-ni kosako South Garo Hills a·jani social activist Greneth M Sangma, West Garo Hills a·jani Superintendent of Police (SP)-na badi ka·doangaha.
SP-na sedoatgipa chittio Sangma-ni parakatani gitade, ia dolrangni, an·tangtangni man·gnina chanchie, manderangko salruraenggipa garirangko champengsoengani a·sel, dingtang dingtang kam nangana re·ruraenggipa manderangsa neng·nikanirangko chagrongna nangtokskaaha aro ian niamni kosako re·ani gitaba ong·aha.
“Ia dolrangni kamara, nangchongmota kamrangna re·ruraenggipa manderangna neng·nikanirangkosan ra·baaijaha indiba a·songni niam bidiko mandena on·gimin bilko pe·ani gitaba ong·aha,” ine Sangma, SP-na sedoatgipa chittio parakataha.
Sangma-ni parakatani gitade, Indian Constitution-ni Article 19(1)(d)-ni ning·o a·songo songdongenggipa manderangna a·song gimikon jakgitele re·rurana bilko on·aha aro Article 301-ni ning·oba jakgitele bading chiwalna on·ahani gimin iandake ia dolrangni champengataniara a·songni niamko aro mandena on·gimin bilko pe·ani gita ong·enga.
“Uni gimin ia dolni ong·gija dakgipa kamrangna ta·raken rakgipa ja·kurangko de·china anga mol·molenga,” ine South Garo Hills a·jani social activist, West Garo Hills-ni SP-na sedoatgipa chittio janapataha.
Manderangko salbaenggipa winger gari bolsako Tura-ni biap damsao iandake badiaba manderangni champengsoaniko Mongolbar salo, video-rangoniko niksona man·ahachim aro ia a·sel ong·ani ja·man, Garo Hills gimikon manderangko ding·chaoattokahachim. Tura-o iandake winger gariko champengatani ja·man Dalu-oba Baghmara-chipakni re·baenggipa garirangko champengsoskaahachim.