SHILLONG: Ia 2025 bilsini gisepo, me·chikrangko so·ote galani aro me·chikrangni kosako ong·gija dakani case-rang, Meghalaya a·dokni dingtang dingtang a·jarango tang·doengako nikna man·enga ine Meghalaya State Commission for Women (MSCW) parakataha.
“Me·chikrangko iandake so·ote galani aro ong·gija dakaniara an·chingni songsalo mandeni janggina mande ra·gijaniko mesokani ong·enga aro ian me·chik aro bi·sarangna naljokani gri ong·aniko mesokani ong·enga,” ine MSCW-ni chairperson Iamonlang Syiem aganaha.
A·doko me·chik aro bi·sarangni kosako ong·gija dakaniko commission, jako ra·enga aro me·chikrangni kosako ong·gija dakgipa case mingantikon name nipilenga ine janapatengon, me·chik aro bi·sarangni kosako iandake so·ote galani aro ong·gija dakaniko Commission raken jegala ine Syiem aganaha.
“Ia case-rangoniko chinga ka·saninggija dake jakkalani, ka·o nangani aro ka·mikkenatanirangkoba nikna man·aha. Nokrango aro kam ka·chakram biaprango iandake me·chikrangna naljokani gri ong·enganina commission namen suk ong·ja,” ineba ua aganaha.
Badiaba gittimrango ba kam ka·chakgipa biaprango iandake me·chikrangni kosako ong·gija dakanirangko nikgenchimode ba koborko man·genchimode ta·raken police-rangna u·iatchina gitaba MSCW-ni chairperson, a·doko songdongenggipa mande sakantikon didiataha.
Me·chik aro bi·sarangni kosako ong·gija dakanirangko commission champengna gita rakbee kamrangko ka·enga ine janapatengon, me·chik aro bi·sarangni gimin koborrangko on·engon namen simsakchina aro mikrakchina gita Syiem, kobor setimgiparangkoba didiataha.
“Media-an koborrangko on·anio namen bilakgipa kol gita ong·ani gimin me·chik aro bi·sarangni gimin maiba koborrangko on·engon, name simsakesa on·china aro ong·gija dakgipa noksa ba video-rangko watjachina anga mol·molenga,” ine MSCW-ni chairperson parakataha.