TURA: Garo Hills Autonomous District Council (GHADC)-o kam ka·enggiparang, ja 42-ni dormaharangko man·tokkujaengani gimin kamrangko dontongate, salbongana asonge jingjengataniko dakengon, Budbar salo, GHADC-ni Chief Executive Membor (CEM) Albinush Marak, Non Gazetted Employees Association (NGEA)-ni dilgiparangko okamatenba, jingjengataniko dontongchina mol·molahachim indiba NGEA-ni dilgiparang, uni mol·molaniko ra·chakjaha.
Iani bidingo NGEA-ni president Brithen Sangma-o sing·sandiaton, kam ka·giparangna dormaharangko on·ani giminde GHADC-ni CEM maming ku·rachakaniko on·jaha aro GHADC-ni namgnina chanchie jingjengataniko dontongchinasa aganaiahani gimin uamang uni mol·molaniko knachakna jechakaha ine parakataha.
“Chinga indita bilsi indita jarangna dormaha gri kamko ka·e on·aha uamang chingni gimin maikoba chanchiahama? Chingaba uamang gitan jik-dedrang dongpagiparang, nokdang-ba·kuko chalaienggiparangan ong·a indide chingara maikai chingni jik-dedrangko, nokdang ba·kuko chalaiatenga?” ine Sangma sing·doatenba, uamangna bilsisani dormahako on·na ku·rachakaniko on·kujaskalde, jingjengataniko dontongjawa ine gisik ra·atpiltaianiko on·angaha.
GHADC-o kam ka·giparangni man·na nangkuenggipa dormaharang da·o gimik ja 42 gappilengahaoba GHADC-ko chalaienggipa Executive Committee (EC)-oni maming ka·dongatani kattarang dongkujani gimin ia jingjengataniko dakna draatako man·aha ineba Sangma parakataha.
GHADC-o kam ka·enggipa manderangni kamrangko dontongate jingjengatani da·al Bristibar salode salbri gapengahachim ine nikna man·a.
Uamangni salbongana jingjengatanio, bilsisani dormaharangko on·na gita ku·rachakaniko on·jagenchimode, ia jingjengataniko dakangkuaigen ineba NGEA-ni president parakataha.1
