Pepsico karkana, Rongrang chiringo moila watenga ine MPYC badi ka·a

RESUBELPARA: North Garo Hills a·jani Mendipathar-o donggipa Varun Bevarage (Pepsico) karkana moila gnanggipa aro mitchigipa chiko Rongrang chiringona watenga ine Meghalaya Pradesh Youth Congress (MPYC)-ni president Timjim K Momin, North Garo Hills a·jani Deputy Commissioner-na badi ka·doanga.
Uni badi ka·gipa chittio janapani gitade, Meghalaya Industrial Development Corporation (MIDC)-ni chalaienggipa Varun Beverages Ltd (Pepsico) karkanani moila gnanggipa aro mitchigipa chiko Rongrang chiringona watengani a·sel Hatibasi, Soksan aro sepangjolo donggipa songni manderang, gama ge·ani aro dingtang dingtang kamrangna chiko jakkalanio neng·nikanirangko chagrongna nangenga.
“Jolo donggipa manderangni badi ka·aniko man·soe anga an·tangan ua biapona re·ange nieaha aro re·ange nieon, karkanani moila gnanggipa mitchigipa chiko, Rongrang chiringona watengako nikaha,” ine Momin parakataha.
Ia chiringko jakkalenggipa Hatibasa aro Soksan jolo donggipa manderangni aganani gitade, ia chiko jakkalani ja·man bang·a manderang, be·enrang ka·kita, mesaka aro an·gil sa·dikanirangko man·enga. Moila gnanggipa chi ong·ani a·sel gama ge·anirangoba namja, noko jila kaanirangba saa ding·aniko man·ani gimin ua joloni manderangde an·tangtangni be·en bimangna kenchakenba, ia chiko je nanganinaba jakkalsrangjaha ineba songni manderang aganaha.
Ian samtangtango dongengipa sam bolrangnasan ong·aija, ritchani ritcha nokdangrangnan simsaksona nangani ong·enga ineba Momin, DC-na badi ka·gipa chittio janapataha.
Ia indake karkanani moela gnanggipa chiko chiringona joljol wataniara, Environmetal (Protection) Act 1986, Water (Prevention and Control of Pollution) Act 1974, Violation of the Right to Life and Clean Environment aro uandakgipa niamrangko pe·a ga·akenga ineba Momin parakataha.
“Uni gimin ia niamrangko ja·rike ta·raken ja·ku de·na nanga, konta 48-ni gisepon songsalni manderang baksa ia biapona District Administration, Pollution Control Board aro Health Department re·ange niena nanga. Water (Prevention and Control of Pollution) Act, 1974-o pangchake, ia karkanani chio moila wataniko ta·raken dontongatna nanga,” ine MPYC-ni president Timjim K Momin, North Garo Hills-ni Deputy Commissioner-ko didiataha.