AMPATI: South West Garo Hills a·jao ma·mong sorkarini scheme-rangko nambate chu·sokatna man·na gita Budbar salo, Tura-ni MP Saleng A Sangma, District Development Coordination & Monitoring Committee (DISHA)-ni tom·aniko Ampati-ni DRDA Conference Hall-o ong·atangenba, dingtang dingtang department-ni kamrangko nipilangaha.
Ia tom·anio Tura-ni MP aro DISHA-ni Chairman Saleng A Sangma baksana DISHA-ni membor-rang, chong·motan UG Sangma, Simberth Ch Marak, Learmilford A Sangma, Manseng D Sangma aro gipinrangba dongpae bak ra·angtokaha.
Ia tom·anio, South West Garo Hills a·jani Deputy Commissioner Hema Nayak, DRDA-ni Project Director RZD Shira, District Administration-ni gipin official-rang aro dingtang dingtang department-ni official-rangba dongpae bak ra·angaha.
Ia tom·anio dingtang dingtang department-ni officer-rang, an·tangtangni department ning·o, ra·gate ka·enggipa aro chu·sokatgimin kamrangko Tura-ni MP-na agan-talate on·angtokaha. Chu·sokanirang baksana kamrangko ka·anio chagrongna nangenggipa neng·nikani aro mikkangchi dakna miksonganirangkoba official-rang, Tura-ni MP-na talate on·angaha.
Dingtang dingtang department-rangni neng·nikanirangko nangchakegipa ministry-rangna u·iatskana ku·rachakaniko on·angengon, sorkarini scheme-rangko, a·songo songdongenggipa mande sakantionan sokatna gita ia scheme-rangni gimin manderangna u·iataniara scheme-ko jako ra·e ka·enggipa department aro officer-rangni daitoan ong·a ine Tura-ni MP Sangma aganaha.
Ia tom·anio, sanna banani kamrang, jekai an·o donggipa me·chikrang aro bi·sarangna simsak nirokani, an·chi komigipa me·chikrangna simsak nirokani aro samrangko sokate on·ani bidingo chanchirimangengon, Ampati Civil Hospital-o nanganirangkoba Tura-ni MP sing·e ra·angjolaha.
Una agreba, South West Garo Hills a·jani dingtang dingtang department, jekai Power, ICDS, Agriculture, Fishery aro uandakgipa department-rangni giminba ia tom·anio Tura-ni MP chanchirimdilangaha.