TURA: Manderangko salbaenggipa winger gari bolsako Tura-ni biap damsao dolsa manderangni champengsoako video-rango niksoani ja·man Garo Hills gimikon manderangko ding·chaotani gita ong·aha.
Koborko on·ani gitade, Assam-oni Garo Hills-ni dingtang dingtang biaprang, jekai Dalu, Ampati, Chokpot, Gasuapara aro uandakgipa biaprangona manderangko salruraenggipa garirang, Chandmari Sumo station-o neng·takgija salengani a·sel, station-ko chalaienggipa dolna noksan ong·na nangenga ine matnangenba, ia dolni manderang, Assam-ona salruraenggipa garirangko champengna jotton ka·ahachim.
Indake ong·genchimoba, iani bidingo West Garo Hills a·jani District Transport Office (DTO)-ni gita am·sandie nion, ia garirang pilakan a·doktango on·enggipa permit gnangsa salenga aro ia garirango nangchongmotgipa lekkarang dongani gimin ia garirangko iandake pa·sike champengna man·ja ine official-rang parakatskaaha.
Tura-o gipin biaprangoni re·ruraenggipa garirangko champengna jotton ka·ahani gimin Dalu-oba Baghmara aro gipin biaprangoni re·baenggipa garirangko champengsona jotton ka·aniko video-rango niksona man·skaaha aro bang·a manderangan iana suk ong·gijaniko parakattokaha.
Assam-oni Garo Hills-ona salruraenggipa garirangko Tura-o champengsona jotton ka·ahani gimin official-rango sing·sandiaton, iani niamni a·palo ong·a maina ia garirangko am·sandie nion, uamang nangchongmotgipa lekkarang gnangsa salruraenga ine ma·sina man·aha ine parakataha.
“Assam aro Garo Hills-ni gisepo manderangko salruraenggipa garirang, Assam, Meghalaya, Mizoram aro Arunachal Pradesh a·dokrango salrurana permit donggipa garirangsa ong·a aro ia garirangko darangba champengna niam dongja,” ine Transport official parakataha.
Badiaba garirang, niamni a·palo ba nangchongmotgipa lekkarang gri salgenchimoba ia garirangni kosako sorkarisa nanga gita ja·kurangko de·gen ineba official aganaha.