TURA: South Garo Hills-ni environmental body- Nokrek Area Development Committee, Chokpot-ni MLA Sengchim N Sangma-ko gronge, uni constituency-ni ning·o donggipa jolrango dongenggipa manderangni chagrongenggipa neng·nikarangko nirokatchina mol·mole memorandum-ko on·aha.
South Garo Hills-ni Durabanda-Awegre, Anchigre, Waggi Chiringgre, Rongchangre, Dana Adugre aro Mekalpagre-ona re·gipa ramani obosta namsrangjani bidingo organisation, janape, ua ramarangko tarie on·china mol·molaha. Ramani obosta namjani a·sel jolni manderang aditan dingtang dingtang neng·nikarangko chagrongna gita nangenga, salantini janggi tanganio nangchakenga. Game cha·giparang, school re·gipa bi·sarangna re·rurana neng·nikan baksa jinma manderangna saan ding·an salrango re·rurana bilongen neng·nika ine janape organisation, ramako tarie on·china dabiaha.
Iarangni gisepon organisation, Mekalpagre songo gital lower primary school building-ko rikchina mol·molaha. Unbaksana Rongdi An’chenggre songo donggipa Durama Wa·gegitok RMSA Secondary-o Mathematics, Science aro English subject-rangko skie on·gipa skigipako rimnapchina mol·molaha. Maina ua school-o skigiparang dongjae poraigipa bi·sarangna bilongen neng·nikani ong·enga.
