TURA: Meghalaya Bharat Scouts & Guides-ni salbrina South West Garo Hills-Ampati Govt Highers Secondary School-o ong·atgipa Summer Camp, namen matchotangaha. July 14 tarikoni 17 tarikona ong·atangaha.
Ia camp-ko ong·atani miksonganiara Scouts and Guides-ni chadamberangko songsalni daka-rika bewalrangko talbate u·ie ma·sie ra·atna miksonganio ong·ataha. Summer camp-o skie on·anirangko dakanga baksana dingtang dingtang susaanirangko jekai- kal·susani, git ring·ani aro chrokanirangko ong·ataha. Chadamberang, songsalni mongsonggiparan ong·a, uamang songsalna dingtang dingtang kamrangko dangdike on·na man·a, iarangko skie on·na jotton ka·aha.
Chu·gimik camp-o sak 103 chadamberang bakko ra·aha. Jeoni sak 65 Guides, sak 23 Scouts, sak 5 Rovers, sak 4 Rangers aro sak 6 staff-rang ong·a.
Camp-ni skanggipa salo Ampati Govt. Higher Secondary School-ni Principal Chingky G Momin, student-rangna aganprakangaon, uamangna didiani kattarangko aganaha. Aro camp-ko oprakate on·aha.
Indake Sub-Divisional School Education Officer, Ampati, T Ch Marak aro Sub-Divisional Medical & Health Officer, Ampati , Dr. Lydia M Marak – uamangba camp-ni gnigipa salo mongsonggipa sokgipa ong·e bakko ra·aha.
Ia Summer Camp-o District Secretary MBS&G Ampati, Pular D Shira, District Organising Commissioner (S) Debarson A Sangma baksa dilangaha.
