SHILLONG: Bilsisani gisepo Meghalaya-ni Indo-Bangla sima arioniko Border Security Force-ni sipairang sak 400 baten manderangko niamgri napsrukna jotton ka·mitingo rim·aha.
BSF Meghalaya-ni watgipa data-ni gita batanggimin bilsi 2024 August 5 tarikoni ia bilsi 2025 July 15 tarikona sak 421 manderangko Indo-Bangla sima ariniko rim·aha.
Rim·a man·giparangoni sak 279 Bangaldesh-ni ong·a aro sak 142 India-ni manderang ong·a.
Meghalaya-o Indo-Bangladesh sima arini chu·gimik 443 km-ni km 59 simako kapanga matchotkuja.
Sima ari gita niamgri napsrukgiparang batrikrikengani gimin BSF sipairang sima ario chelchakaniko bilakdapataha.
Silchek kapenga dongijagipa sima arini bidingo BSF, changsatai Meghalaya sorkariko, uamangna pakwatchina mol·molaha. BSF dolna a·ako pakwate on·node uamang sima ariko kapengna kamrangko ka·angna aganahachim indiba sorkari, a·akon on·na man·jaenga.
Meghalaya, Bangladesh baksa km 443 sima ari nangdima. Mitam jolrango sima ari kapengako jolni stakeholder-rang namnikjae jegalaha. Sima ari kapengako zero line-oni a·bachengna nanga. India-ni a·jao napgipa 150 yard-oni a·bachengako jegalaha. Maina indake ong·ode bang·a manderangni a·a aro songni a·arang napanggen.
Mejaomangmang BSF-ni Inspector General, Chief Minister Conrad Sangma-ko gronge sima ario chelchak-naljokani bidingo, napsrukani aro sima ario ong·gija kam ka·ani bidingrango u·iataha.
