SHILLONG: Sorkarini ong·gijagipa kamrangna dingtang dingtang dolrangni aro a·doko songdongenggipa manderangni ku·rang on·aniko jegalrongani gimin National People’s Party (NPP)-ko Voice of the People’s Party (VPP) matnangatenba, ian North Korea a·songo jekai sorkarini kamko jegalna man·gijagipa sorkariko chalaina jotton ka·aniko mesokani gita ong·enga ine parakataha.
NPP-chi dilenggipa MDA sorkarini kosako ku·rang on·aniko adita salrangna skang, NPP Women’s Wing-ni president aro Nongskhen-ni MDC Grace Mary Kharpuri-ni jegalatahani gimin VPP, NPP-ko matnangatskaaha.
A·doko mitam manderang, sorkarini kamrangko matnangrongengani a·selan Meghalaya a·dokko a·gilsakni gipin biaprango niksengna man·jaenga ine Kharpuri aganahachim.
Uni iandakgipa kattarangko jegalatengon, “Na·simang (NPP) North Korea-ni dilgipa Kim Jong Un gita sason ka·na miksongengama?” ine VPP-na ku·wattimgipa Batskhem Myrboh sing·doatenba, a·dokni namgnina ku·rang on·anikoba uamang jegalronga ine matnangataha.
Sorkarini kamrang namjagenchimoba a·dokni manderang, sorkariko mittele aganakosa NPP aro Kharpuri nangnikengama ineba ua sing·doataha.
“Lekka poranio ja·manchakani, kangal cha·a sianio batroroani, rama jal·langrangni namjabatroroani, bijolirangko chu·onga gita on·na man·gijani, gari gorarangni apchangketani, manderangni tangka paisarangko skatang koros ka·e galani aro pekatgipa samrangko jakkalanirang batroroengon, manderangni ku·rang on·na ka·dongengani a·selsa ong·enga ine na·simang (NPP) chanchiama?” ine Myrboh aganaha.
Saksa dilgipa ong·e iandakgipa kattarangko agananiara bi·sani chanchianiko mesokani gitasa ong·aia ineba VPP-ni dilgipa matnangataha.
“Iandake pa·sikgipa kattarangko an·ching dilgiparangoniko ka·dongna man·ja. Ian name chanchina changkugijagipa aro kakketko ra·chakna man·gijagipa bi·sani agana gitasan ong·aia,” ine Myrboh aganaha.
Namgipa a·dokko ong·atna gitade, mongsongbate manderangni namgnina pangnan sorkarini kamrangko sing·dona, jegalna aro jera ra·grikna cholko on·na nanga ineba ua aganaha.