SHILLONG: Meghalaya a·doko niam gri napsruke songdongenggipa manderangko champengna aro a·dokni Tribal manderangko chel·chakna ra·gatgipa Meghalaya Residents Safety & Security Act (MRSSA) 2016-ko jakkalchipkujaengani gimin NPP-chi dilenggipa MDA sorkariko, Federation of Khasi Jaintia & Garo People (FKJGP) matnangataha.
Sima arirango Assam a·dokni napdrae dokkol ka·anirangko champengna man·jaengani giminba FKJGP, a·dok sorkariko matnangataha.
Ia kamrangko ta·raken jako ra·jagenchimode rakgipa ja·kurangko de·chakatna gitaba FKJGP-ni dilgiparang mikrakataniko on·angaha.
Iani bidingo kobor ra·timgiparang baksa agangrikengon, a·doko Inner Line Permit (ILP)-ko ra·gatchina gita dol 13 NGO-rang dabie jingjengatanirangko dakani ja·man ra·gatgipa MRSSA 2016-ko da·onan jakkalchipgija donenga ine FKJGP-ni vice president Kitboklang Nongphlang, a·dok sorkariko matnangataha.
Ia MRSSA-ko taridapna nanganirang dongkuenga ine pa·sikenba a·dok sorkari, ia niamko jakkalgija donchipenga ineba ua matnangataha.
“COVID-19 sajinmani somoion sorkari, ramram niamrangko ra·gatanichi gipin biaprangoni re·baenggipa manderangko champengna man·genchimode maini gimin sorkari, MRSSA-ko da·onan jakkalgija donchipskaenga?” ine Nongphlang sing·doataha.
A·dokni dilgiparang, an·tangtangni daitorangko chu·sokatani pal, an·tangtangni nanganirangnasa gisik on·batskaenga ineba ua aganaha.
Sima jolrango songdongenggipa Khasi Tribal-rangko chel·chakna man·jaengani giminba ua sorkarini kamo suk ong·gijaniko parakataha.
West Jaintia Hills a·jani Block-I ning·o donggipa Lapangap songo Pnar manderangko Karbirangni chadrapani gimin janapatengon, “Assam aro Meghalaya a·dokni simarango songdongenggipa chingni manderangko a·dok sorkari chel·chakna man·jahani gimin chinga namen suk ong·ja,” ine FKJGP-ni vice president parakataha.
2022 bilsio Mukroh songo, Assam forest guard-rang aro police-rangni skatang goanichi songni sakbonga manderang so·otako man·ani giminba ua gisik ra·atpiltaianiko on·angaha.
“Da·alonan a·dok sorkariko Assam sorkari, dilsretna gita man·engkua. Kakketko niatgenchimode Assam sorkari da·omangba Meghalaya a·dok ning·o napdrana jotton ka·engkua,” ine Nongphlang aganaha.