WILLIAMNAGAR: Re·anggipa July-ni 18 tariko, East Garo Hills a·jani Samgong jolo, me·chik saksako attechi den·e so·otanio, ia me·chikna maming chel·chakanirangko on·na man·jahani gimin Williamnagar Women’s Police Station-ni officer-in-charge (OC)-ko kam dontongataha.
Iako Sombar salo, East Garo Hills a·jani Superintendent of Police (SP), Garo Students Union (GSU) Eastern Zone (EZ)-ni membor-rangna, uko grongeani somoio parakataha.
GSU-EZ Williamnagar-oni u·iatani gitade, an·tangni ‘mikchagipa’ me·asani ka·mikkenatako man·ahani gimin ia me·chik, an·tangni ripeng sakgni baksa Williamnagar-ni One Stop Centre (OSC)-ona re·ange, an·tangna ong·a obostarangko aganenba, chel·chakaniko on·china aganeahachim aro OSC-o kam ka·gipaba niamo pangchake, ia me·chikni bidingo Williamnagar Women’s Police Station-ni OC-na u·iatahachim.
Matnanga man·gipa mandeara, POCSO case-o kate dongenggipa ine ma·siahaoba ia me·chikna OSC aro Women’s Police Station-ni gita maming chel·chakanirangko on·jana aro batesa ia me·chikko, dos dakgipa mandeni nokchipakna watatskaaha ine GSU-EZ parakataha.
“Ia me·chikna maming chel·chakanirangko on·gija batesa me·asani dongchakgipa nok sambachipakna watataha aro iani a·selan ia me·chikko dos dakgipa mande, so·ote galna cholko man·aha,” ine GSU-EZ Williamnagar-ni dilgiparang parakatenba, maini gimin OSC-o ia me·chikna dakchakanirangko on·na man·jaha aro ia me·chikna kenchakna nanganiko u·iatani ja·manba maini gimin police-rang, ia me·chikna maming chel·chakanirangko on·jaha ine sing·doataha.
“Da·alo chinga GSU-EZ-ni membor-rang, Williamnagar-ni SP-ko gronge, ia a·selko gisiko nange jako ra·china didieaha aro ua, Williamnagar Women’s Police Station-ni OC-ko suspend ka·aha ine chingna u·iataha. Williamnagar-o songdongenggipa manderangna naljokaniko aro chel·chakaniko on·na gita ua an·tangan rakbee kamko ka·enga ineba ua chingna ku·rachakaniko on·ataha,” ine GSU-EZ-ni dilgiparang parakataha.
Indake ong·engon, ia a·selni bidingo kakketko ma·sina man·na gita magisterial inquiry-ko dakchina, dos dakgipa mandeko BNS aro POCSO-ni niamrango pangchake rakgipa sastirangko on·china, so·ota man·gipa me·chikni nokdangna gong lak 10 tangkako compensation dake on·china, inquiry-ko dakanio official-rang kamtangko name ka·jaha ine ma·sigenchimode official-rangni kosako rakgipa ja·kurangko de·china aro mikkangchi dakchakaniko nangenggipa manderangna nambate dangdike on·na man·na gita OSC aro Women’s Police Station-ni kamrangko namdapatchina gita GSU-EZ, East Garo Hills a·jani Deputy Commissioner-ko didiataha.